بریگزٹ کے باعث سکاٹ لینڈ کی آزادی کی حمایت میں ریکارڈ اضافہ

سکاٹ لینڈ کے دارالحکومت ایڈنبرا سے ہفتہ ستائیس اپریل کو ملنے والی نیوز ایجنسی روئٹرز کی رپورٹوں کے مطابق برطانیہ کے اس صوبے کی باقی ماندہ برطانیہ عظمیٰ سے ممکنہ آزادی کی سیاسی سوچ یوں تو کئی عشرے پرانی ہے لیکن اس سوچ اور اس کے لیے سیاسی حمایت میں گزشتہ چار برسوں میں اتنا زیادہ اضافہ دیکھنے میں آیا ہے، جتنا پہلے کبھی نہیں دیکھا گیا تھا۔

ماہرین کے مطابق اس کی سب سے بڑی وجہ برطانیہ کا یورپی یونین سے آئندہ اخراج ہے، جسے مختصراﹰ بریگزٹ بھی کہتے ہیں۔

سکاٹش عوام میں لندن سے آزادی کی اس سوچ کی ایک بڑی وجہ یہ بھی ہے کہ ایسے سکاٹش رائے دہندگان میں بڑی تعداد ان شہریوں کی ہے، جو چاہتے ہیں کہ انہیں مستقبل میں بھی یورپی یونین کا حصہ رہنا چاہیے۔

YouGov نامی سروے کے مطابق جون 2018ء میں سکاٹ لینڈ کے تقریباﹰ 45 فیصد باشندے یہ چاہتے تھے کہ اسکاٹ لینڈ کو برطانیہ سے آزادی حاصل کر لینا چاہیے۔ اب لیکن نو ماہ بعد یہی شرح بڑھ کر 49 فیصد ہو چکی ہے۔ مزید یہ کہ سکاٹ لینڈ میں برطانیہ سے آزادی کے حامی ووٹروں کی یہ وہ زیادہ سے زیادہ شرح فیصد ہے، جو آج تک ریکارڈ کی گئی ہے۔

نیوز ایجنسی روئٹرز کے مطابق یہ اعداد و شمار سکاٹ لینڈ کی آزادی کی حامی سیاسی جماعت سکاٹش نیشنلسٹ پارٹی یا ایس این پی کے موسم بہار کے کنوینشن کے موقع پر سامنے آئے ہیں۔ سکاٹ لینڈ کی حکومتی سربراہ نکولا سٹرجن نے ابھی حال ہی میں یہ بھی کہہ دیا تھا کہ ان کی حکومت علاقائی پارلیمان میں عنقریب ہی ایک ایسا مسودہ قانون پیش کرے گی، جسے اس سال کے اواخر تک منظور کر لیا جائے گا۔

پھر اس نئے قانون کے تحت سکاٹ لینڈ میں 2021ء تک ایک ایسا نیا اور مجموعی طور پر دوسرا ریفرنڈم کرایا جائے گا، جس میں سکاٹش ووٹر یہ فیصلہ دے سکیں گے کہ آیا سکاٹ لینڈ کو برطانیہ سے علیحدگی اختیار کرتے ہوئے ایک خود مختار ملک بن جانا چاہیے۔

سکاٹ لینڈ کی ممکنہ آزادی سے متعلق گزشتہ اور اپنی نوعیت کا اب تک کا واحد ریفرنڈم 2014ء میں کرایا گیا تھا۔ اس میں 45 فیصد کے مقابلے میں 55 فیصد کی اکثریت سے سکاٹش ووٹروں نے یہ رائے دی تھی کہ سکاٹ لینڈ کو برطانیہ کا حصہ ہی رہنا چاہیے۔

ایسا سکاٹش ریفرنڈم کے دو سال بعد 2016ء میں ہوا تھا کہ برطانیہ نے یورپی یونین سے اپنے اخراج کا فیصلہ کیا تھا، جس پر ابھی تک عمل درآمد نہیں ہو سکا۔ برطانیہ میں عملی طور پر ابھی تک اس بارے میں بہت زیادہ ابہام پایا جاتا ہے کہ آیا برطانیہ یورپی یونین سے واقعی نکل جائے گا اور اگر ایسا ہوا، تو کب تک اور کن حالات میں ممکن ہو سکے گا۔

م م / ع ح / روئٹرز