بلبل طوفان کے سبب تین ہلاک اور لاکھوں افراد بے گھر

بحیرہ عرب میں اٹھنے والا سمندری طوفان 'بلبل‘ ہفتہ اور اتوار کی درمیانی شب بھارت کے مشرقی اور بنگلہ دیش کے جنوبی ساحلوں سے ٹکرایا اور بڑے پیمانے پر تباہی کا سبب بنا۔ حکام کے مطابق طاقتور سمندری طوفان کے باعث کم از کم تین افراد ہلاک جب کہ ہزاروں گھر متاثر ہوئے۔

حکام نے مزید بتایا ہے کہ ہفتے کی شب یہ سمندری طوفان جب سندر بن کے ساحل سے ٹکرایا تو شدید بارشوں کے علاوہ اس کے ساتھ 120 کلو میٹر فی گھنٹہ تک کی رفتار سے چلنے والی طوفانی ہوائیں بھی تھیں۔ بھارت اور بنگلہ دیش کے درمیان یہ علاقہ مینگروو کے جنگلات سے بھرا ہوا ہے۔

بھارتی ریاست مغربی بنگال کے دارالحکومت کلکتہ میں ایک شخص اس وقت مارا گیا جب طوفانی ہواؤں کے سبب ایک درخت اس پر گر گیا۔ ہمسایہ ریاست اڑیسہ میں ایک اور شخص دیوار گرنے کے سبب ہلاک ہو گیا۔ بنگلہ دیش میں بھی ایک شخص گھر پر درخت گرنے کے سبب مارا گیا۔

طوفان سے قبل بنگلہ دیش میں تین لاکھ جبکہ بھارت میں ایک لاکھ پچیس ہزار لوگوں کو محفوظ مقامات پر منتقل کیا گیا۔

متاثرہ علاقے کے سب سے بڑے اور مرکزی کلکتہ ایئرپورٹ پر احتیاطاﹰ تمام پروازیں معطل کر دی گئیں۔ ماہرین کے مطابق اب یہ طوفان شمال مشرق کی طرف بڑھ گیا ہے اور آج اتوار کی سہ پہر تک اس کی شدت میں کمی واقع ہو جائے گی۔

ڈی ڈبلیو کے ایڈیٹرز ہر صبح اپنی تازہ ترین خبریں اور چنیدہ رپورٹس اپنے پڑھنے والوں کو بھیجتے ہیں۔ آپ بھی یہاں کلک کر کے یہ نیوز لیٹر موصول کر سکتے ہیں۔

ا ب ا / ع آ (ڈی پی اے)