بنگلہ دیش: آٹھ ہزار روہنگیا پہلے میانمار واپس جائیں گے

گزشتہ سال اگست میں میانمار میں روہنگیا اقلیت کے خلاف ہوئے ایک فوجی کریک ڈاؤن کے نتیجے میں قریب سات لاکھ روہنگیا افراد ہجرت کر کے بنگلہ دیش آئے تھے جو اب مہاجر کیمپوں میں مقیم ہیں۔ میانمار کی فوج کی جانب سے کیے گئے فوجی آپریشن میں مبینہ طور پر سینکڑوں روہنگیا مسلمان افراد ہلاک ہوئے جبکہ اِن کے متعدد دیہات اور گھروں کو جلا کر راکھ کر دیا گیا۔

بنگلہ دیشی وزیر داخلہ اسد الزماں خان نے بتایا ہے کہ میانمار اور بنگلہ دیش کے مابین ان مہاجرین کی واپسی کے معاہدے کے تحت ایک ہزار چھ سو تہتر خاندانوں کے آٹھ ہزار پناہ گزینوں کو سب سے پہلے بھیجا جا رہا ہے۔

اسد الزماں خان نے میانمار کے اپنے ہم منصب کے ساتھ ایک طویل ملاقات کے بعد صحافیوں سے بات کرتے ہوئے کہا،’’ میانمار نے وزارت داخلہ کے ذریعے بھیجے جانے والے خاندانوں کی فہرست دینے کا مطالبہ کیا تھا۔ ہم نے فہرست فراہم کر دی ہے اور اب میانمار اپنے شہریوں کو واپس لینے کی تیاری کر رہا ہے۔‘‘

بنگلہ دیش کے وزیر داخلہ اسد الزماں خان نے روہنگیا مہاجرین کے پہلے گروپ کی واپسی کے حوالے سے کسی ٹائم فریم سے تو آگاہ نہیں کیا تاہم یہ ضرور کہا کہ ڈیل پر عمل درآمد جلد شروع ہو جائے گا۔

گزشتہ سال تیئس نومبر کو دونوں ممالک کے درمیان ہونے والی اس ڈیل میں کہا گیا تھا کہ روہنگیا مہاجرین کی میانمار واپسی کا عمل دو ماہ کے اندر شروع کر دیا جائے گا تاہم پھر بنگلہ دیش کی طرف سے تیاری مکمل نہ ہونے کے سبب معاہدے پر عمل درآمد میں تاخیر ہوئی۔

عالمی دباؤ کی وجہ سے میانمار کی حکومت نے عہد ظاہر کیا تھا کہ وہ ان مہاجرین کی وطن واپسی کے لیے اقدامات کرے گی۔ تاہم ساتھ ہی یہ بھی کہا تھا کہ ان مہاجرین کو یہ ثابت کرنا ہو گا کہ وہ راکھین ریاست سے ہی تعلق رکھتے ہیں۔