بھارت میں ہزاروں لوگ مرنے کے لیے کس شہر کا سفر کرتے ہیں؟

بھارت کے  مقدس شہر وارانسی پہنچنے والے بزرگ ہندوؤں میں سےکچھ کے پاس وہاں قیام کے لیے صرف چند دن ہی ہوتے ہیں جبکہ چند دیگر افراد کئی دہائیوں تک اپنی موت کا انتظار کرتے رہتے ہیں۔ لیکن اپنی زندگی کے آخری ایام میں وہاں کا رخ کرنے والے ہندو عقیدت مندوں کا ہجوم اس لیے پرسکون اور پراعتماد ہوتا ہے کہ موت کے سفر کے لیے ان کی یہ یک طرفہ یاترا انہیں لازوال امن فراہم کرے گی۔

وارانسی میں دریائے گنگا کے کنارے قطار میں رکھی گئی چتاؤں سے ہر لمحے دھواں بلند ہوتا رہتا ہے، یہ وہ جگہ ہے جہاں ہر سال ہزاروں ہندو عقیدت مند اپنے آخری ایام گزارنے آتے ہیں۔ ہندو مذہبی عقائد کے مطابق گنگا کے کنارے مرنا اس بات کی ضمانت ہےکہ  مرنے والے کی لاش وہیں جلائی جائے گی اور  پھر اس کی راکھ دریا کےکناروں یا ''گھاٹوں‘‘ کے ساتھ ساتھ بہتے پانی میں بکھیر دی جائے گی۔ اس عمل کے بارے میں ہندوؤں کا خیال ہے کہ یہ انہیں دنیا میں دوبارہ جنم لینے کے چکر سے نجات دلاتا ہے۔

92 سالہ بدری پرساد اگروال نے ملک کی مغربی ریاست راجستھان سے 1,000 کلومیٹر (620 میل) سے زائد کا فاصلہ کئی دنوں میں طے کیا اور انہیں یہ جان کر خوشی ہوئی کہ وہ مرنے کے لیے اب صحیح جگہ پر ہیں۔ اپنی زندگی کے ایک طویل اور مشکل سفر کے اختتام  پر آرام کرتے ہوئے اس بوڑھے ہندو یاتری نے کہا، ''یہ خدا کی اپنی زمین ہے۔‘‘

ان کا کہنا ہے کہ ان کے خدا نے انہیں بتایا ہے کہ ان کے پاس زندہ رہنے کے لیے مزید پانچ مہینے ہیں۔ وہ انہیں ایک ایسی پناہ گاہ میں گزارنے کے لیے تیار ہیں، جو ان لوگوں کو خدمات مہیا کرتی ہے، جو وارانسی اپنے آخری ایام  ماضی اور مستقبل کے بارے میں پرسکون غور و فکر میں گزارنے کے لیے آتے ہیں، ایک ایسا مستقبل جس کے بارے میں انہیں یقین ہے کہ وہ آئے گا۔

اگروال نے کہا، ''میں ہر روز خدا سے بات کرتا ہوں۔ جلد ہی میں خدا کے گھر میں سکون سے رہوں گا۔‘‘ انہیں فی الحال ایک چیریٹی گیسٹ ہاؤس میں رہنے کے لیے جگہ مل گئی ہے، جسے ممکشو بھون ہاسپیس کہتے ہیں،  ''نجات کے متلاشیوں کا گھر‘‘ جو اس شہر میں قائم کئی ''نجات کے گھروں‘‘ میں سے ایک ہے۔ اس مرکز میں چالیس کمرے ہیں، جو ان ہزاروں لوگوں میں سے کچھ کے کام آتے ہیں، جو مرنے کے لیے وارانسی آتے ہیں۔

اگروال وہاں جا کر خوش ہیں کیونکہ یہ مقدس گنگا دریا کے قریب ترین مقامات میں سے ایک ہے، صرف ایک منٹ کی دوری پر۔ وہاں شمشان گھاٹ کی آگ مسلسل بھڑکتی رہتی ہے۔ ہندوؤں کے لیے بھارت کا شمالی شہر وارانسی، جسے ماضی میں بنارس کہا جاتا تھا، دنیا کے مقدس ترین مقامات میں سے ایک ہے۔ یہ بھگوان شیو کا شہر ہے، جو تباہی کے دیوتا مانے جاتے ہیں اور ہندو عقائد کے مطابق ان کی دوبارہ تخلیق سے پہلے ہی انہیں تباہ کر دینا چاہیے۔  لوگ صدیوں سے ''موکشا‘‘ یا آزادی کی تلاش میں یہاں کا سفر کر رہے ہیں۔

کچھ لوگ اکیلے ہی ان نجات گھروں کا رخ کرتے ہیں اور وہاں گزر بسر کے لیے خیرات پر انحصار کرتے ہیں۔ کچھ شادی شدہ جوڑے  ہوتے ہیں۔ چند دیگر اپنی زندگی کی جمع پونجی زاد راہ کے طور پر استعمال کرتے ہیں یا اپنی دیکھ بھال کے لیے رشتہ داروں کو ساتھ لاتے ہیں۔

وارانسی میں بیماروں کے لیے طبی سہولیات تو موجود ہیں لیکن اس مقدس شہر میں موت پر ماتم کرنے جیسی کوئی چیز موجود نہیں۔ اس کے بجائے، وہاں موت کو ایک نعمت سمجھا جاتا ہےکیونکہ وہاں مرنے کے لیے جانے والے ہندو بزرگوں کا ماننا ہوتا ہے کہ ان کی روحیں زندگی اور موت کے چکر سے آزادی حاصل کر لیں گی۔ بہتر سالہ نتھی بائی دو سال قبل وارانسی منتقل ہو گئی تھیں، جو مانی کارنیکا  شمشان گھاٹ کی جگہ پر اپنا آخری وقت آنے کا انتظار کر رہی ہیں۔ ان کا کہنا ہے، ''میں چاہتی ہوں کہ جنازہ ہو، میری روح کو سکون ملے اور میری راکھ گنگا میں بہا دی جائے۔‘‘

نتھی بائی نے ان لوگوں کی آخری رسومات دیکھی ہیں، جو اپنے اس پرجوش یقین کے ساتھ مرے تھے کہ ان کے لیے آئندہ نجات ہی نجات ہے۔ انہوں نے کہا کہ وہاں لوگوں کو آخری رسومات کے لیے ایک دیوتا کی طرح تخت پر لے جایا جاتا ہے۔ انہوں نے کہا، ''یہاں بہت احترام ہے اور سب کچھ بہت اچھے طریقے سے کیا جاتا ہے۔‘‘

گلاب بائی 30 سال پہلے اپنے شوہر کے ساتھ وہاں گئی تھیں۔ ان کے شوہر سات سال بعد مر گئے تھے اور اب  وہ خود بھی اپنے شوہر کے پاس جانے کے لیے تیار ہیں۔  ہندو عقیدے میں مقدس سمجھے جانے ولے زعفرانی رنگ کی ساڑھی میں ملبوس 91 سالہ گلاب بائی سکون سے اپنی باری کا انتظار کر رہی ہیں۔ انہوں نے کہا، ''یہاں مرنا اور آخری رسومات کی ادائیگی، زندگی اور موت کے نہ ختم ہونے والے چکر کو توڑ دیتے ہیں۔ یوں میں بھی نجات حاصل کر لوں گی۔‘‘

ش ر⁄ م م (اے ایف پی)