ترک صدر روتی ہوئی بچی سے، ’کیا تم شہید ہونا چاہتی ہو؟‘

ترک شہر قہرمان مرعش میں پیش آنے والے اس واقعے پر متعدد حلقوں کا خیال ہے کہ ترک صدر رجب طیب ایردوآن بچوں کو پروپگینڈا کے لیے استعمال کر رہے ہیں۔ تفصیلات کے مطابق ایردوآن جنوب مشرقی انطالیہ میں اپنی جماعت ’اے کے پی‘ کے ایک اجلاس میں شرکت کے لیے گئے تھے۔ اس موقع پر اپنے خطاب کے دوران انہوں نے فوجی وردی میں ملبوس ایک چھوٹی سے بچی کو اسٹیج پر بلایا اور کہا، ’’کیا تم شہید ہونا چاہتی ہو؟‘‘

شدت جذبات سے اس بچی کی آنکھوں سے آنسو نکلنا شروع ہو گئے تھے۔ اس لمحے ایردوآن نے کہا کہ فوجی روتے نہیں، ’’اگر تم میدان جنگ میں ماری گئی تو ہم تمہیں ترک پرچم سے ڈھک دیں گے۔‘‘ بعد ازاں ترک صدر نے پیار سے چھ سالہ بچی تیراس کے رخسار کا بوسہ بھی لیا تھا۔

ایردوآن کے اس خطاب کے بعد سماجی رابطوں کی ویب سائٹس پر شدید بحث شروع ہو گئی۔ متعدد صارفین کا خیال ہے کہ ریاست کی ذمہ داری بچوں کو ہلاکت کی ترغیب دینے کے بجائے انہیں ایک اچھی زندگی مہیا کرنے کی کوشش کرنا ہے۔

شامی حکومت اور کُرد فورسز ترک آپریشن کے خلاف متحد

عفرین آپریشن: دو ترک فوجی ہلاک، ہیلی کاپٹر تباہ

 ترکی میں  بچوں کو سیاسی مقاصد کے لیے استعمال کرنے کا یہ پہلا واقعہ نہیں ہے۔ ابھی کچھ دن قبل ہی ترک سرکاری ٹیلی وژن ٹی آر ٹی نے ایک چھ سالہ بچے کا ویڈیو پیغام نشر کیا تھا، جس میں وہ کہہ رہا ہے، ’’میرے والد علیحدگی پسند اور دہشت گرد کرد تنظیم ’پی کے کے‘ کے خلاف فری سیریئن آرمی کی صفوں میں ترک افواج کے شانہ بشانہ لڑ رہے ہیں۔ میری دعا ہے کہ اللہ ان کی حفاظت کرے اور انہیں کامیابی دے۔ میں صدر کا شکر گزار ہوں، جو میرے لیے دادا کا درجہ رکھتے ہیں۔‘‘