تکریت کی اجتماعی قبریں،’اسلامک اسٹیٹ‘ کے ظلم و ستم کی داستاں

خبررساں ادارے ڈی پی اے نے بغداد سے ملنے والی رپورٹوں کے حوالے سے بتایا ہے کہ تکریت شہر سے ملنے والی چودہ اجتماعی قبروں میں لاشوں کے ڈھیر لگے ہوئے ہیں جبکہ ان میں سے بہت سی لاشوں کی شناخت ممکن نہیں ہے۔ عراقی فورسز نے ابھی گزشتہ ہفتے ہی سنی انتہا پسند تنظیم’اسلامک اسٹیٹ‘ کو پسپا کرتے ہوئے اس شہر کو بازیاب کرایا تھا۔ ان جہادیوں نے گزشتہ برس جون میں اس اہم شہر پر قبضہ کیا تھا۔

اعلیٰ عراقی حکام نے اپنی شناخت ظاہر نہ کرنے کی شرط پر جرمن خبر رساں ادارے ڈی پی اے کو بتایا کہ ان اجتماعی قبروں سے فوجیوں کی لاشیں بھی برآمد ہوئی ہیں۔ بتایا گیا ہے کہ جب گزشتہ برس جون میں جہادیوں نے اس شہر پر حملہ کیا تھا تو انہوں نے بہت سے فوجیوں کو بھی مغوی بنا لیا تھا۔ ان جنگجوؤں نے اس وقت اعتراف کیا تھا کہ انہوں نے 17 سو شیعہ فوجیوں کو ہلاک کرتے ہوئے 800 سنی فوجیوں کو عام معافی دے دی گئی تھی۔

ان جہادیوں نے نہ صرف تکریت پر قبضے کے دوران اپنے مخالفین کو ہلاک کیا بلکہ اس شہر پر قابض ہونے کے بعد بھی شہریوں پر ظلم و ستم ڈھانے کا سلسلہ جاری رکھا۔ بتایا گیا ہے کہ بہت سے لاشیں تکریت شہر میں دریائے دجلہ کے کنارے واقع سابق عراقی آمر صدام حسین کے محلاتی کے کمپاؤنڈز سے بھی ملی ہیں۔

عراقی فرانزک ٹیموں نے ان اجتماعی قبروں سے لاشوں کی باقیات کو جمع کرنے کا عمل شروع کر دیا ہے۔ حکومتی ترجمان نے اس یقین کا اظہار کیا ہے کہ ’اسلامک اسٹیٹ‘ کے شدت پسندوں نے سینکڑوں فوجیوں کو ہلاک کر کے ان قبروں میں پھینک دیا تھا۔ عراق میں ہیومن رائٹس منسٹری سے وابستہ کامل امین نے ایسوسی ایٹڈ پریس کو بتایا ہے کہ تکریت شہر میں ملنے والی آٹھ اجتماعی قبروں سے انسانی باقیات نکالنے کے لیے ماہرین سے خدمات حاصل کی جا رہی ہیں۔

کامل امین نے بتایا ہے کہ پیر کے دن ان اجتماعی قبروں سے بارہ لاشوں کا نکال کر ڈی این اے ٹیسٹ کے لیے بھجوا دیا گیا تھا۔ انہوں نے کہا کہ عراق بھر میں متاثر ہونے والی 85 کنبوں کے ڈی این اے نمونے حاصل کر لیے گئے ہیں اور یوں ڈی این اے نمونوں کے موازنے سے لاشوں کی شناخت ممکن ہو سکے گی۔

کامل امین نے مزید کہا، ’’لاشوں کی شناخت کا عمل جاری ہے۔ ہمیں توقع ہے کہ اس شہر کے مختلف علاقوں سے مزید اجتماعی قبریں برآمد ہو سکتی ہیں اور اِس باعث لاشوں کی تعداد بہت زیادہ ہونے کے امکانات کو بھی رد نہیں کیا جا سکتا ہے۔‘‘