جاپانی باشندوں کے قتل پر نئی بحث کا آغاز

خبر رساں ادارے اے ایف پی نے تجزیہ نگاروں کے حوالے سے لکھا ہے کہ سنی شدت پسند گروہ اسلامک اسٹیٹ کے جنگجوؤں کی طرف سے جاپانی یرغمالیوں کے سر قلم کیے جانا دراصل ٹوکیو حکومت کے لیے ’ایک انتباہ‘ ہے۔ تاریخی حوالے سے دیکھا جائے تو جاپان نے مشرق وسطیٰ کے تنازعات کا حصہ بننے سے اجتناب ہی کیا ہے اور بحرانی حالات میں اس ملک کا ردعمل کبھی بھی زیادہ مؤثر نہیں رہا۔ یہ بھی کہا جا سکتا ہے کہ بالخصوص مشرق وسطیٰ میں ٹوکیو حکومت کے سفارتی ذرائع کمزور ہیں۔

تاکو شوکو یونیورسٹی سے وابستہ سلامتی امور کے ماہر پروفیسر تاکاشی کاواکامی کہتے ہیں، ’’جاپانی حکومت کے پاس سکیورٹی معلومات کی کمی ہے اور یوں کسی بھی بحرانی صورتحال سے نمٹنا مشکل ہو جاتا ہے۔‘‘ وہ مزید کہتے ہیں کہ جاپانی یرغمالیوں کی ہلاکت ایک انتباہ ہے اور اس تناظر میں اب ٹوکیو حکومت کو ملکی اور غیر ملکی سطح پر خفیہ معلومات کے تبادلے کے عمل کو مؤثر بنانا ہو گا۔

اسلامک اسٹیٹ کی طرف سے ہفتے کے دن جاری کی گئی ایک ویڈیو میں جاپانی یرغمالی کینجی گوٹو کا سر قلم کرتے دکھایا گیا تھا جبکہ ایک ہفتہ قبل انہی شدت پسندوں نے گوٹو کے ساتھی ہارونا یوکاوا کو بھی اس طرح قتل کر دیا تھا۔

یہ امر اہم ہے کہ جاپان کا مشرق وسطیٰ میں اہم اتحادی ملک اردن ہے، جو خود ہی اسلامک اسٹیٹ کے جنگجوؤں کے زیر حراست اپنے ایک پائلٹ کو آزاد کرنے کی کوشش میں ہے۔ اس بحران نے ٹوکیو کی اس علاقے میں رابطوں اور سیاسی سوجھ بوجھ میں خامیوں کو نمایاں کر دیا ہے۔ تاہم اتوار کے روز جاپانی حکومت نے اعلان کیا کہ وہ خفیہ معلومات کے تبادلے کے لیے اپنی صلاحیتوں کو بہتر بنائے گی اور بیرونی ممالک میں قائم جاپانی تنصیبات کے لیے سکیورٹی انتظامات میں بھی اضافہ کیا جائے گا۔

جاپانی شہر کیوٹو میں واقع دوشیشو یونیورسٹی میں اسلامک اینڈ مڈل ایسٹرن اسٹڈیر کے پروفیسر ماسا نوری نیاتو کے بقول زیادہ بہتر ہوتا اگر ٹوکیو اپنے باشندوں کی رہائی کے لیے ترکی کی مدد حاصل کرتا کیونکہ انقرہ نے اسلامک اسٹیٹ کی قید میں اپنے یرغمالیوں کی بازیابی کو بھی ممکن بنایا تھا۔ وہ مزید کہتے ہیں، ’’بظاہر معلوم ہوتا ہے کہ اب حکومت اس بات پر غور کرے گی کہ اگر کسی دوسرے ملک میں کسی جاپانی شہری کو خطرہ ہو تو اس کے لیے فوج کو استعمال کیا جائے۔‘‘

جاپان کے ایک اہم اخبار ’یومیوری‘ نے اس نکتے پر زور دیا ہے کہ اسلامک اسٹیٹ کے جنگجوؤں کے ہاتھوں جاپانی باشندوں کی بہیمانہ ہلاکت کے بعد اب اس ملک کے تمام رہنماؤں کو اس بارے میں ایک متفقہ اور مؤثر حکمت عملی تیار کرنا ہو گی کہ مستقبل میں ایسے کسی نئے واقعے سے احسن طریقے سے نمٹا جا سکے۔ ’یومیوری‘ کے مطابق سیاسی وابستگیوں کو بالائے طاق رکھتے ہوئے تمام جاپانی سیاستدانوں کے مابین اس حوالے سے جامع مذاکرات کی ضرورت ہے۔

دریں اثناء جاپانی وزیر اعظم شینزو آبے پر دباؤ بڑھتا جا رہا ہے کہ ان کی حکومت ملکی فوج کی صلاحیتوں کو مزید بہتر بنانے کے لیے ریاستی آئین میں ترمیم کرے۔ دوسری عالمی جنگ کے بعد سے جاپانی آئین میں فوج کا کردار صرف دفاع تک ہی محدود ہے۔