جرمن الیکشن میں سیاسی پارٹیاں تارکین وطن کی حمایت کے لیے کوشاں

جرمنی کی موجودہ چانسلر انگیلا میرکل نے تقریباً تین سال قبل کہا تھا کہ ان کے ملک میں کثیرالنسلی معاشرت کے قیام کو ناکامی کا سامنا ہے اور اس بیان کو جرمنی میں آباد تارکین وطن نے پسند نہیں کیا تھا لیکن اب جوں جوں انتخابات قر یب آ رہے ہیں میرکل کی قدامت پسند سیاسی جماعت کے ساتھ ساتھ دوسری سیاسی پارٹیاں بھی تارکین وطن کے ووٹوں کے حصول کی کوشش میں دکھائی دیتی ہیں۔ جرمنی میں کُل رجسٹرڈ ووٹرز میں تارکین وطن کے ووٹوں کا تناسب دس فیصد بنتا ہے۔ ماہرین یہ سوچنے پر مجبور ہیں کہ کیا یہ تناسب کسی اہمیت کا حامل ہے یا نہیں۔

انگیلا میرکل کو پیئر اشٹائن برُوک کے ساتھ ٹیلی وژن مباحثے کے دوران اس وقت پریشانی کا سامنا ہوا جب ایک چینی نژاد ماہرِ تعمیرات پروفیسر وِلفریڈ وانگ نے میرکل کے تین سالہ پرانے بیان کے ریفرنس میں کہا کہ ان کی تقریر سے قبل وہ خود کو ایک جرمن تصور کرتے تھے لیکن اُس بیان کے بعد وہ خود کو دوبارہ چینی محسوس کرتے ہیں۔ میرکل نے پروفیسر وانگ کو تسلی و تشفی دیتے ہوئے کہا کہ ان کے بیان کا مقصد کسی کے جذبات کو مجروح نہیں کرنا تھا بلکہ ایک زبان بولتے ہوئے ان کے ملک کی ثقافت میں دوسرے معاشروں کا ہر فرد ضم ہوتے ہوئے اپنا کردار ادا کر سکتا ہے۔

جرمن دارالحکومت برلن کا وسطی علاقے کروئٹس برگ کو جرمنی میں آباد تیس لاکھ ترک آبادی کا ایک بڑا گڑھ خیال کیا جاتا ہے۔ برلن کے کرؤٹس برگ میں آباد ترک جرمن آبادی بھی اس صورت حال سے آگاہ ہے۔ کروئٹس برگ کے ایک نوجوان کا خیال ہے کہ وہ ایس پی ڈی کو یقینی طور پر ووٹ ڈالے گا کیونکہ روایتی طور پر یہ ورکنگ کلاس کی جماعت ہے۔

اسی بستی میں کچھ اور نوجوان ماحول دوست سیاسی جماعت گرینز کی جانب مائل دکھائی دیتے ہیں۔ جرمنی میں آباد ہونے والی ترک خاندانوں کی دوسری نسل سوشل ڈیمو کریٹک پارٹی اور گرینز کے دوہری شہریت رکھنے کے وعدے سے متاثر دکھائی دیتی ہے۔ دوہری شہریت کی مخالفت میں میرکل کی کرسچیئن ڈیموکریٹک یونین ہے۔

بعض جائزوں کے مطابق جرمنی میں آباد تارکین وطن کی نصف آبادی کے پاس ووٹ دینے کا حق ہے اور جوں جوں نئی نسل بالغ ہوتی جا رہی ہے، اس میں مسلسل تبدیلی آ رہی ہے۔ اِس وقت جرمنی میں دس برس سے کم عمر کا ہر تیسرا بچہ جرمن تارکین وطن سے تعلق رکھتا ہے۔

ایسا خیال کیا جا رہا ہے کہ آبادی میں تبدیلی کے تناظر میں تارکین وطن کے ووٹ مستقبل کے انتخابات میں کلیدی اہمیت کے حامل ہوں گے۔ ایک غیر سرکاری تنظیم برٹلزمین فاؤنڈیشن کے سربراہ اورکان کوزے مین کے مطابق جرمن سیاسی جماعتوں نے تارکین وطن کے ووٹوں کی اہمیت کا احساس کرنا شروع کر دیا ہے۔ ترک ٹی وی پر اپنے انٹرویو میں جرمن چانسلر میرکل نے بھی انضمام کے عمل کو مزید تیز کرنے کا عندیہ دیا ہے۔