حمید گل امریکی انٹیلی جنس ایجنسی کے رکن تھے، وکی لیکس

خبر رساں ادارے اے ایف پی کے مطابق وکی لیکس نے پیر ستائیس فروری سے اس امریکی انٹیلی جنس کمپنی سے متعلق لاکھوں خفیہ ای میلز کو عام کرنا شروع کر دیا ہے۔ وکی لیکس کے مطابق یہ ای میلز جولائی 2004ء تا دسمبر 2011ء کے دورانیے کی ہیں۔ ان ای میلز کو پڑھ کر باآسانی اس امریکی انٹیلی جنس کمپنی کی سرگرمیوں سے متعلق معلومات حاصل کی جاسکتی ہیں۔ ان کے ذریعے Stratfor کے جاسوسوں کے نیٹ ورک، انہیں کی گئی ادائیگیوں، کام کی نوعیت اور دیگر متعلقہ رازوں سے پردہ اٹھ سکتا ہے۔ یہ انٹیلی جنس کمپنی سیاسی و عسکری امور کے ماہر امریکی شہری جورج فرائڈ مین کے زیر انتظام ہے اور جیو پولیٹیکل تجزیات سے متعلق خدمات فراہم کرنے کی فیس وصول کرتی ہے۔

وکی لیکس کی جانب سے جاری پریس ریلیز میں کہا گیا ہے، '' مواد میں یہ دکھایا گیا ہے کہ ایک نجی انٹیلی جنس ایجنسی کیسے کام کرتی ہے، اور وہ لوگوں کو کیسے اپنے کارپوریٹ اور حکومتی آجر کے لیے ہدف بناتے ہیں۔'' وکی لیکس نے دعویٰ کیا ہے کہ اس کے پاس اس امریکی انٹیلی جنس ایجنسی اور بڑے کارپوریٹ اداروں جیسے بھوپال کی ڈاؤ کیمیکلز، لاک ہیڈ مارٹن اور حکومتی اداروں کے مابین خفیہ روابط کی معلومات موجود ہے۔

وکی لیکس نے اس ضمن میں امریکی داخلہ سلامتی کے محکمے اور امریکی محکمہ دفاع کی انٹیلی جنس ایجنسی کا بھی ذکر کیا ہے۔ وکی لیکس کا یہ بھی دعویٰ ہے کہ ان ای میلز کے عام ہونے سے امریکی حکومت کی وہ کوششیں بے نقاب ہوجائیں گی، جس کے تحت وہ وکی لیکس کے ایڈیٹر ان چیف جولیان آسانج پر حملہ کیا جارہا ہے۔ وکی لیکس کے مطابق ای میلز سے ثابت ہوجائے گا کہ یہ امریکی انٹیلی جنس ایجنسی ان افراد کے کوائف اکٹھا کر رہی تھی جو 1984ء کے بھوپال حادثے سے متعلق ڈاؤ کیمیکلز کے خلاف آن لائن آواز بلند کر رہے تھے۔

یاد رہے کہ ایک 24 سالہ امریکی فوجی بریڈلی میننگ پر الزام ہے کہ اُس نے خفیہ سرکاری دستاویزات تک وکی لیکس کو رسائی فراہم کی۔ اس پر امریکی تاریخ میں انٹیلی جنس ضوابط کی بد ترین خلاف ورزی سمیت 22 دیگر الزامات عائد ہیں۔

رپورٹ: شادی خان سیف

ادارت: عدنان اسحاق