خلیج کے علاقے میں بحری جہازوں پر حملے: تفتیش کی جائے، ایران

ایرانی دارالحکومت تہران سے پیر تیرہ مئی کو ملنے والی نیوز ایجنسی اے ایف پی کی رپورٹوں کے مطابق متحدہ عرب امارات اور سعودی عرب کی طرف سے اتوار کو کیے جانے والے ان دعووں کے بعد کہ متحدہ عرب امارات کی بندرگاہ فجیرہ کے قریبی سمندری علاقے میں ان مبینہ حملوں سے متعدد آئل ٹینکروں سمیت کئی بحری جہازوں کو نقصان پہنچا ہے، ایران نے ان حملوں کو ’پریشان کن‘ قرار دیتے ہوئے مطالبہ کیا ہے کہ ان کی باقاعدہ چھان بین کی جانا چاہیے۔

ایرانی وزارت خارجہ کی ویب سائٹ پر جاری کردہ اس وزارت کے ترجمان عباس موسوی کے ایک بیان کے مطابق، ’’بحیرہ عمان کے علاقے میں ان واقعات کی خبریں پریشان کن بھی ہیں اور باعث افسوس بھی۔‘‘

ساتھ ہی انہوں نے خطے میں غیر ملکی طاقتوں کی طرف سے سمندری سلامتی کو نقصان پہنچانے کی کوششوں اور ’کسی بھی مہم جوئی‘ کے خلاف خبردار کرتے ہوئے یہ مطالبہ بھی کیا کہ ان حملوں کی بھرپور چھان بین ہونا چاہیے۔

قبل ازیں اتوار بارہ مئی کو متحدہ عرب امارات کی حکومت نے کہا تھا کہ فجیرہ کی بندرگاہ کے قریب مختلف ممالک کے کم از کم چار تجارتی بحری جہازوں کو سبوتاژ کرنے کے لیے حملے کیے گئے تھے۔ اس کے بعد آج پیر کی صبح سعودی عرب کی طرف سے یہ کہا گیا کہ ان حملوں میں اس کے دو تیل بردار بحری جہازوں کو نقصان پہنچا۔ ان حملوں کی ان سے زیادہ تفصیلات نہیں بتائی گئیں۔

متحدہ عرب امارات کی بندرگاہ فجیرہ کی خاص بات یہ ہے کہ یہ اس ملک کی بحیرہ عرب کے ساحلی علاقے پر واقع واحد بندرگاہ ہے، جو خلیج ہرمز سے زیادہ دور نہیں ہے۔ یہ علاقہ خلیجی ممالک کے برآمدی تیل اور گیس کی بحری مال برداری کا راستہ ہے جو عالمی منڈیوں کو تیل کی ترسیل کے لیے ایک انتہائی اہم بین الاقوامی سمندری روٹ بھی ہے۔

خلیج میں امریکی بمبار طیارے

ماضی میں ایران امریکا کے ساتھ اپنی عسکری کشیدگی کے تناظر میں کئی بار یہ دھمکی بھی دے چکا ہے کہ وہ اس اہم سمندری تجارتی راستے کو بند بھی کر سکتا ہے۔

خلیج کے علاقے میں کئی بحری جہازوں پر ان مبینہ حملوں کی خاص بات یہ ہے کہ یہ ایک ایسے وقت پر کیے گئے ہیں، جب امریکا ایران کی طرف سے مبینہ دھمکیوں کے بعد خطے میں اپنے بی باون بمبار جنگی طیارے بھی تعینات کر چکا ہے۔

پومپیو برسلز میں

اس کے علاوہ یہ حملے ایک ایسے وقت پر بھی کیے گئے ہیں، جب امریکی وزیر خارجہ مائیک پومپیو آج پیر کے روز بیلجیم میں یورپی رہنماؤں کے ساتھ ایران کے بارے میں تفصیلی بات چیت کر رہے ہیں۔

امریکی وزیر خارجہ برسلز میں بات چیت کے بعد روس چلے جائیں گے، جہاں وہ اپنے روسی ہم منصب سیرگئی لاوروف کے ساتھ ایک اہم ملاقات کریں گے۔ یہ دورہ مائیک پومپیو کا روس کا اولین دورہ ہو گا۔

ایرانی وزارت خارجہ کے مطابق اتوار کے روز خلیج کے علاقے میں مختلف بحری جہازوں پر جو حملے کیے گئے، وہ ’وضاحت کے متقاضی‘ ہیں اور اس بات کے بھی کہ یہ حملے کس نے کیے، اور ان حملوں کے دوران مختلف بحری جہازوں کو پہنچنے والے نقصانات کی ’اصل شدت اور وسعت‘ کیا تھی۔

م م / ع س /  اے ایف پی