دارالحکومت نئی دہلی بھارت کا ’ریپ کیپیٹل‘ بھی

دہلی کے پولیس کمشنر بھیم سین بَسّی نے آج جمعے کے روز ایک سالانہ بریفنگ میں صحافیوں کو بتایا کہ پندرہ دسمبر سے پہلے کے بارہ مہینوں کے دوران ملکی دارالحکومت میں خواتین کے ساتھ جنسی زیادتیوں کے مجموعی طور پر 2069 واقعات ریکارڈ کیے گئے۔ اس عرصے سے پہلے کے ایک سال کے دوران عورتوں اور لڑکیوں کے ریپ کے واقعات کی یہی تعداد 1571 رہی تھی۔ پولیس کمشنر کے بقول اس ایک سال کے دوران شہر میں ریپ کے واقعات کی شرح میں 31.6 فیصد اضافہ ریکارڈ کیا گیا۔

نیوز ایجنسی اے ایف پی نے نئی دہلی سے اپنی رپورٹوں میں لکھا ہے کہ بھارتی دارالحکومت کو ملک کا ’ریپ کیپیٹل‘ بھی کہا جاتا ہے۔ دو سال قبل اس شہر نے اسی حوالے سے اپنی ساکھ کی تصدیق اس طرح کی تھی کہ ایک چلتی بس میں متعدد مجرموں نے میڈیکل کی ایک جواں سال طالبہ کو اجتماعی جنسی زیادتی کا نشانہ بنایا تھا اور بعد ازاں اس لڑکی کا انتقال ہو گیا تھا۔ نئی دہلی میں یہی گینگ ریپ ملک میں وسیع تر عوامی مظاہروں کے ساتھ ساتھ پولیس کے شعبے اور قوانین میں اصلاحات کے ایک طویل سلسلے کی وجہ بھی بنا تھا۔

اے ایف پی کے مطابق نئی دہلی میں خواتین کے خلاف جنسی جرائم سے متعلق یہ سالانہ اعداد و شمار آج ایک ایسے دن جاری کیے گئے، جب آن لائن ٹیکسی سروس ’اوبر‘ کے ایک ڈرائیور کو نئی دہلی ہی میں دوسری مرتبہ ایک عدالت میں پیش کیا گیا۔ اس ٹیکسی ڈرائیور پر الزام ہے کہ اس نے گزشتہ مہینے اپنی گاڑی میں سفر کرنے والی ایک خاتون کو ریپ کیا تھا۔ آج کی عدالتی کارروائی کے دوران پانچ دسمبر کے روز رونما ہونے والے اس جرم کے 32 سالہ ملزم شیو کمار یادو کو مزید تین دن کے لیے پولیس کی تفتیشی تحویل میں دے دیا گیا۔

خواتین کے خلاف نئی دہلی میں جنسی جرائم سے متعلق سالانہ اعداد و شمار جاری کرتے ہوئے پولیس کمشنر بھیم سین بَسّی نے زور دے کر کہا، ’’نئے ڈیٹا کا مطلب لازمی طور پر یہ نہیں کہ نئی دہلی خواتین کے لیے اور زیادہ خطرناک ہوتا جا رہا ہے۔ اس سے زیادہ تر یہ بات واضح ہوتی ہے کہ ریپ کا نشانہ بننے والی خواتین میں اب ایسے جرائم کو رپورٹ کرنے پر آمادگی بڑھتی جا رہی ہے۔‌‘‘

پولیس کمشنر بَسّی کے بقول ریپ اور خواتین کے خلاف دیگر جنسی جرائم کی روک تھام کے سلسلے میں ضرورت اس بات کی ہے کہ ایسے جرائم سے متعلق ’معاشرے اور پولیس دونوں کی ذہنیت بدلی جائے‘۔ انہوں نے کہا کہ بھارتی معاشرے کو اپنے اندر ’جنسی جرائم کے خلاف زیادہ حساسیت‘ پیدا کرنا ہو گی۔