سیاسی پناہ کا مشترکہ یورپی نظام ضروری ہے، میرکل

جرمن چانسلر انگیلا میرکل نے اپنے ہفتہ وار ویڈیو پوڈکاسٹ میں یورپی یونین کے ارکان کو خبردار کرتے ہوئے کہا کہ یونین کی ایسی رکن ریاستوں کو، جو بلاک سے مالی تعاون کی امید رکھتی ہیں، مہاجرین اور تارکین وطن کے معاملے پر بھی یکجہتی کا مظاہرہ کرنا چاہیے۔ چانسلر میرکل نے یونین کے رہنماؤں سے مطالبہ کیا کہ وہ یورپی یونین کی سطح پر پناہ کے مشترکہ قوانین بنانے کے لیے پیش رفت کریں۔

یورپ کو داخلی یک جہتی کی ضرورت ہے، جرمن چانسلر

جرمنی میں نئی حکومت کیسی ہو گی؟

ہفتہ سترہ فروری کے روز جاری کیے گئے اس ویڈیو پیغام میں جرمن چانسلر کا کہنا تھا، ’’یکجہتی ایک طرفہ ٹریفک نہیں ہے۔‘‘ میرکل کا کہنا تھا کہ یونین کے اجتماعی مفاد کو پیش نظر رکھتے ہوئے کئی رکن ممالک کی معیشت بہتر بنانے کے لیے انہیں ان کے حصے سے زیادہ رقم دی جاتی ہے، اسی طرح انہیں مہاجرین کے معاملے پر بھی اجتماعی مفاد پیش نظر رکھنا چاہیے۔

انگیلا میرکل نے اس امید کا اظہار بھی کیا کہ یورپی رہنما رواں برس جون تک پناہ کے مشترکہ یورپی قوانین تیار کر لیں گے۔ یورپی یونین کا آئندہ غیر رسمی سربراہی اجلاس اگلے ہفتے منعقد ہو رہا ہے جب کہ باقاعدہ یورپی سمٹ مارچ میں منعقد ہو گی۔

ہنگری، پولینڈ، چیک جمہوریہ اور سلوواکیہ جیسے مشرقی یورپ کے ممالک یورپی کمیشن کے مہاجرین کی منصفانہ تقسیم کا منصوبہ قبول کرنے پر تیار نہیں ہیں۔ یورپ کا رخ کرنے والے تارکین وطن اور مہاجرین کی اکثریت اٹلی اور یونان پہنچتی ہے۔ لازمی کوٹے کے تحت ان تارکین وطن کی دیگر یورپی ممالک منتقلی کے منصوبے کا مقصد ان دونوں ممالک پر دباؤ کم کرنا ہے۔

یورپی کمیشن نے لازمی تقسیم کا منصوبہ سن 2015 میں شروع کیا تھا تاہم مشرقی یورپ کے کئی ممالک اپنے ہاں زیادہ تر مشرق وسطیٰ کے مسلم اکثریتی ممالک سے آنے والے مہاجرین کو پناہ دینے کے لیے رضا مند نہیں ہیں۔ انہی اختلافات کے باعث گزشتہ تین برسوں سے یورپی یونین کی سطح پر پناہ کے یکساں قوانین لاگو کرنے میں مشکلات پیش آ رہی ہیں۔

’مہاجرین کو جرمن سرحدوں سے لوٹایا جا سکتا ہے‘

یورپی کوٹہ سسٹم نہیں، متبادل نظام پر کام کیا جائے، سلوواکیہ