شمالی وزیرستان سے ملحق افغان سرحد کو امریکی فوجیوں نے سیل کر دیا

شمالی وزیرستان سے موصولہ اطلاعات کے مطابق امریکی فوج نے افغان صوبے خوست کو شمالی وزیرستان کے سرحدی گاؤں غلام خان سے ملانے والی مرکزی شاہراہ کو بھی بند کر رکھا ہے۔ شمالی وزیرستان میں موجود پاکستان کے عسکری ذرائع بھی اس امریکی اقدام کی تصدیق کر رہے ہیں تاہم پاکستان کی جانب سے سرکاری طور پر ابھی تک اس پیشرفت پر کسی قسم کا بیان سامنے نہیں آیا۔

مقامی ذرائع ابلاغ نے بھی غلام خان کے رہائشیوں کے حوالے سے بتایا ہےکہ امریکی فوجیوں نے ہفتے اور اتوار کی درمیانی شب افغان علاقے میں پہاڑیوں کی چوٹیوں پر قبضہ کر کے وہاں چوکیاں قائم کر لی ہیں۔ دفاعی تجزیہ کار حسن عسکری نے امریکہ کی جانب سے افغان سرحد کو سیل کرنے کے اقدام پر تبصرہ کرتے ہوئے کہا، ’’یہ اقدام امریکہ کی اس نئی پالیسی کی عکاسی کرتا ہے، جو چند دنوں سے انہوں نے شروع کی ہے۔ ایک تو یہ ہے کہ ڈرون حملے وہ استعمال کریں گے، اس کے ساتھ ساتھ وہاں اپنی فوجی سرگرمی اس لیے بڑھائی ہے کہ شمالی وزیرستان میں جو حقانی گروپ ہے، اس پر دباؤ بڑھایا جائے اور سرحد کے آر پار آمد و رفت کو روکا جائے اس سلسلے میں وہ تلاشیاں بھی لے رہے ہیں۔‘‘

خیال رہے کہ امریکہ کی جانب سے یہ اقدام ایک ایسے وقت میں اٹھایا گیا ہے، جب شمالی وزیرستان میں موجود حقانی نیٹ ورک کے خلاف کارروائی کے لیے پاکستان پر زبردست دباؤ ہے تاہم پاکستان کا موقف یہ رہا ہے کہ حقانی نیٹ ورک پاکستان نہیں بلکہ افغانستان میں سرگرم عمل ہے۔ افغانستان میں پاکستان کے سابق سفیر رستم شاہ مہمند کا کہنا ہے، ’’بظاہر امریکہ نے سرحد کو سیل کرنے کا فیصلہ اُنہی پاکستانی بیانات کے بعد کیا ہے، جس میں حقانی نیٹ ورک کی پاکستان میں موجودگی سے مسلسل انکار کیا گیا۔‘‘

رستم شاہ سے جب یہ پوچھا گیا کہ اگر امریکہ طالبان شدت پسندوں کا پیچھا کرتے ہوئے پاکستانی علاقوں میں داخل ہوا تو اس کا کیا ردعمل ہو سکتا ہے تو انہوں نے کہا، ’’اگر امریکہ زمینی کارروائی کرے گا تو پھر سیاسی قیادت تو شاید زیادہ رد عمل ظاہر نہ کرے لیکن فوج اس کا نوٹس لے گی اور وہ مجبور ہو جائے گی کہ جو نیٹو کی سپلائی لائن ہے، اس کو منقطع کر دے اور یہاں پر پاکستانی فورسز کو مرتکز کیا جائے اور امریکہ کو بتا دیا جائے کہ اگر اسی طرح صورتحال جاری رہی تو پاکستانی فوج یہاں سے دستبردار ہونے پر مجبور ہوجائے گی۔ پھر ساری ذمہ داری نیٹو کی افواج پر ہوگی۔‘‘

دریں اثناء پاکستانی فوج کے ترجمان میجر جنرل اطہر عباس نے کہا ہے کہ پاکستان نے افغانستان اور امریکہ قیادت سے بارہا کہا ہے کہ وہ پاکستانی طالبان کے مفرور کمانڈر مولوی فضل اللہ کے خلاف کارروائی کریں لیکن اب تک کوئی کارروائی نہیں کی گئی ہے۔

ترجمان نے برطانوی خبر رساں ایجنسی کے ساتھ ایک انٹرویو میں کہا ہے کہ فضل اللہ کے جنگجو افغانستان کی جانب قائم اپنی پناہ گاہوں سے کئی مرتبہ سرحد پر دراندازی کر تے ہوئے تقریباً 100 پاکستانی سکیورٹی اہلکاروں کو ہلاک کر چکے ہیں اور یہ مسئلہ بدستور برقرار ہے۔

رپورٹ: شکور رحیم، اسلام آباد

ادار ت: امتیاز احمد