شمالی کوریا کا وفد ایران کے غیر معمولی دورے پر

شمالی کوریا کی سرکاری خبر رساں ایجنسی کے سی این اے نے بدھ کے روز بتایا کہ پیانگ یانگ کا ایک اعلیٰ سطحی اقتصادی وفد کابینہ وزیر یون جونگ ہو کی قیادت میں ان دنوں تہران کے دورے پر ہے۔

اس غیر معمولی دورے کا مقصد دونوں ملکوں کے درمیان باہمی تعاون میں اضافہ ہو سکتا ہے۔ خیال کیا جاتا ہے کہ ان دونوں کے ممالک کے مابین خفیہ فوجی تعلقات بھی قائم ہیں۔

اس اعلیٰ سطحی دورے کی قیادت غیر ملکی اقتصادی تعلقات کے وزیر یون جونگ ہو کر رہے ہیں۔ کے سی این اے کے مطابق انہوں نے روس کے ساتھ پیانگ یانگ کے مابین مختلف میدانوں میں بڑھتے ہوئے تبادلے میں سرگرم کردار ادا کیا ہے اور اس ماہ کے اوائل میں ماسکو کا دورہ کرنے والے ایک وفدکی قیادت بھی کی تھی۔

کے سی این اے نے تفصیلات بتائے بغیر صرف یہ بتایا ہے کہ وفد پیر کو ایران کے دورے پر روانہ ہوا تھا۔

روس کے ساتھ قریبی تعلقات

تہران کا یہ دورہ ایسے وقت ہو رہا ہے، جب پیانگ یانگ ماسکو کے ساتھ اپنے فوجی تعلقات کو مضبوط کر رہا ہے۔

جنوبی کوریا کا دعویٰ ہے کہ شمالی کوریا نے یوکرین جنگ کے لیے روس کو تقریباً سات ہزار کنٹینر بھیجے ہیں۔ یہ مبینہ طور پر شمالی کوریا کے مجوزہ جاسوس سیٹیلائٹ کے لیے ماسکو کی تکنیکی مدد کے بدلے میں بھیجے گئے ہیں۔

شمالی کوریا اور روس دونوں نے ان الزامات کی تردید کی ہے۔

روس نے حال ہی میں شمالی کوریا کی نگرانی کے لیے اقوام متحدہ کی قرارداد کو اقوام متحدہ کی سلامتی کونسل میں ویٹو کر دیا تھا، جس کے بعد کم جون ان کی حکومت نے روس کا شکریہ ادا کیا تھا۔

ایران اور روس کے قریبی فوجی تعلقات ہیں اور دونوں اتحادی بھی ہیں۔ یوکرین میں اپنی جنگ میں روس کی جانب سے ایرانی ساختہ ڈرون استعمال کیے جانے کی بھی خبریں ہیں۔

ج ا /      (اے ایف پی، روئٹرز)