لبنان: فائر بندی کی خلاف ورزی کے دعوے، دوبارہ کرفیو نافذ

لبنانی فوج نے الزام لگایا ہے کہ اسرائیل نے بدھ اور جمعرات کو ''کئی بار‘‘ فائر بندی معاہدے کی خلاف ورزی کی۔ اسرائیل اور حزب اللہ کے درمیان فائربندی بدھ کو علی الصبح شروع ہوئی تھی۔

لبنانی فوج نے سوشل میڈیا پلیٹ فارم ایکس پر ایک پوسٹ میں اسرائیل پر اپنی فضائی حدود کی خلاف ورزیوں اور مختلف ہتھیاروں سے لبنانی سرزمین کو نشانہ بنانے کے الزامات لگاتے ہوئے کہا کہ اسرائیلی فوج نے کئی بار سیزفائر معاہدے کی خلاف ورزی کی۔

اسرائیل اور حزب اللہ کے درمیان فائربندی شروع

لبنانی فوج نے کہا کہ وہ فائر ​​بندی کی خلاف ورزیوں کے سلسلے میں متعلقہ حکام کے ساتھ بات چیت کر رہی ہے۔ قبل ازیں اسرائیل نے کہا تھا کہ اس نے حزب اللہ کی سرگرمیوں کا پتہ لگانے کے بعد جنوبی لبنان میں کارروائی کی تھی۔

اسرائیل کا دعویٰ

اسرائیل نے دعویٰ کیا ہے کہ جنوبی لبنان میں حزب اللہ کی جانب اے فائر بندی معاہدے کی خلاف ورزی کی گئی۔ اسرائیلی ڈیفنس فورسز (آئی ڈی ایف) نے سوشل میڈیا پلیٹ فارم ایکس پر ایک پوسٹ میں کہا کہ انہوں نے حزب اللہ کے کئی جنگجوؤں پر فائرنگ کی، جن میں سے کچھ گاڑیوں میں آئے تھے۔

فائر بندی کے بعد ہزاروں لبنانی شہریوں کی وطن واپسی

آئی ڈی ایف نے ایک الگ پوسٹ میں کہا کہ لبنان میں ایک مشتبہ طیارے کی موجودگی کے بعد اس پر میزائل داغا گیا تھا۔ آئی ڈی ایف نے تسلیم کیا کہ اس سے یہ کارروائی کرنے میں غلطی ہوئی۔

لبنان کی خبر رساں ایجنسی این این اے نے کہا کہ اسرائیلی فورسز نے اس کے علاوہ جمعرات کی صبح لبنان کے جنوب میں مرکبہ قصبے پر فائرنگ بھی کی جس سے دو افراد زخمی ہوئے۔ اس میں مزید کہا گیا ہے کہ ایک ٹینک نے وزانی اور کفر شوبا گاؤں پر بھی فائرنگ کی۔ یہ تینوں گاؤں اسرائیلی سرحد کے قریب واقع ہیں۔

بدھ کی صبح سے نافذ ہونے والے جنگ بندی معاہدے کے تحت حزب اللہ کے عسکریت پسندوں کو دریائے لیتانی سے پیچھے ہٹنا ہے، جو اسرائیل کی سرحد سے تقریباً 30 کلومیٹر شمال میں واقع ہے۔

لبنانی حکام نے سرحد پر واقع شہروں اور دیہات کے باشندوں کو خبردار کیا ہے کہ وہ اسرائیلی افواج کا انخلا مکمل ہونے سے پہلے اپنے گھروں کو واپس نہ جائیں۔ فائر بندی معاہدے کے تحت اسرائیل وہاں سے اگلے 60 دنوں میں اپنی فوجیں واپس بلائے گا۔

لبنان میں جنگ بندی لیکن غزہ پر اسرائیلی بمباری جاری

اسرائیلی وزیر اعظم بینجمن نیتن یاہو نے کہا ہے کہ اگر حزب اللہ فائر بندی معاہدے کی شرائط پر عمل نہیں کرے گی، تو اسرائیل کارروائی کا حق رکھتا ہے۔

جنوبی لبنان میں دوبارہ کرفیو نافذ

اسرائیلی فوج کے ایک ترجمان نے لبنانی شہریوں کو خبردار کیا کہ لبنان کے اس حصے میں رات کا کرفیو نافذ کر دیا گیا ہے، جہاں سے حزب اللہ کی فورسز کو نکلنا ہے۔

اسرائیلی فوج کے ترجمان افی‍خای ادرعی نے ایک آن لائن ایک پوسٹ میں کہا، ''شام 5:00 بجے سے کل صبح 7:00 بجے تک دریائے لیتانی کے جنوب میں کسی بھی طرح کا سفر کرنے یا گھر سے باہر نکلنے پر پابندی ہو گی۔‘‘ انہوں نے کہا کہ دریا کے جنوب میں واقع علاقے کے لوگوں کو اپنی حفاظت کے لیے ان پابندیوں پر عمل کرنا چاہیے۔

اسرائیل، حزب اللہ کے درمیان جنگ بندی جلد متوقع: لبنانی ذرائع

ادرعی نے یہ تنبیہ جمعرات کو سرحد کے قریب جنگ بندی کی خلاف ورزیوں اور حملوں کی اطلاعات کے بعد جاری کی۔

ج ا ⁄ ع ا، م م ( اے پی، اے ایف پی، روئٹرز)