مقبوضہ مغربی کنارے میں اسرائیلی حملے میں چار فلسطینی ہلاک

فلسطینی میڈیا رپورٹوں کے مطابق اسرائیلی حملے کی وجہ سے مقامی رہائشیوں کی زندگی متاثر ہوئی ہے۔ بعض علاقوں میں بجلی کاٹ دی گئی اور فوجی بلڈوزر تنگ گلیوں سے گزرتے ہوئے دیکھے گئے۔

فلسطینی وزارت صحت نے بتایا کہ شمال مغربی کنارے کے شہر جنین میں کیے گئے اس حملے میں چار افراد ہلاک اور 13 دیگر زخمی ہوئے۔ زخمیوں میں سے تین کی حالت نازک بتائی گئی ہے۔

ادھر اسرائیلی فوج نے پیر کے روز بتایا کہ وہ ''انسداد دہشت گردی کے لیے اپنے وسیع تر اقدامات‘‘ کے تحت مقبوضہ مغربی کنارے کے شہر جنین اہداف کو نشانہ بنا رہی ہے۔ اس اقدام کا بنیادی مقصد وہاں ایک مہاجر کیمپ میں قائم اس مبینہ کمانڈ سینٹر کو تباہ کرنا تھا، جسے جنگجو استعمال کر رہے تھے۔

مقبوضہ مغربی کنارے کی اسرائیلی بستی میں فائرنگ سے چار افراد ہلاک

گزشتہ ہفتے اسرائیلی آباد کاروں پر ہونے والی فائرنگ کے نتیجے میں چار اسرائیلیوں کی ہلاکت کے بعد حکومت پر ایسے حملوں کا سخت جواب دینے کے لیے دباؤ اور بڑھ گیا تھا۔

اسرائیل کی بڑی فوجی کارروائی

اسرائیلی فوج کے ترجمان لیفٹیننٹ کرنل رچرڈ ہَیشٹ نے بتایا کہ فضائی حملوں کا آغاز علی الصبح ایک بجے کے فوراً بعد کیا گیا۔ اس دوران اس عمارت کو نشانہ بنایا گیا، جہاں سے جنگجو حملوں کی منصوبہ بندی کرتے تھے۔ انہوں نے کہا کہ اس کارروائی کا مقصد اس عمارت کو تباہ کرنا اور وہاں ہتھیاروں کو ناکارہ بنانا تھا۔

فوجی ترجمان نے کہا، ''اس پر قبضہ کرنا ہمارا مقصد نہیں ہے۔ ہم مخصوص اہداف کے خلاف کارروائی کر رہے ہیں۔‘‘ انہوں نے بتایا کہ اس کارروائی میں تقریباً دو ہزار فوجی حصہ لے رہے ہیں اور فوج نے زمینی فورسز کے لیے راستہ صاف کرنے کے خاطر ڈرونز کے ساتھ متعدد حملے کیے۔

گو کہ اسرائیل مغربی کنارے کے علاقے پر حالیہ ہفتوں کے دوران اکا دکا فوجی حملے کرتا رہا ہے، تاہم ہَیشٹ نے کہا کہ پیر کے روز جو حملے کیے گئے، وہ سن 2006 میں فلسطینی انتفاضہ کے بعد سے دیکھنے کو نہیں ملے تھے۔

مغربی کنارے میں اسرائیلی حملے میں متعدد فلسطینی ہلاک

اسرائیل نے حالانکہ کہا کہ اہداف کو نشانہ بنا کر حملے کیے جا رہے ہیں لیکن فلسطینی سوشل میڈیا پر جاری کی جانے والی ویڈیوز میں ہجوم والے علاقے سے دھوئیں کے بادل اٹھتے دکھائی دے رہے ہیں۔ دیگر ویڈیوز میں زخمیوں کو اسٹریچرز پر لاتے ہوئے دیکھا جا سکتا ہے۔

فلسطینی خبر رساں ایجنسی وفا کے مطابق فوج نے کیمپ کو جانے والی سڑکوں پر رکاوٹیں کھڑی کر دی ہیں، فوجی مکانات اور عمارتوں میں داخل ہو گئے ہیں اور چھتوں پر بھی اسنائپر پوزیشنیں لیے ہوئے ہیں۔

ایجنسی کے مطابق فوج نے بڑے علاقے کی بجلی کاٹ دی ہے اور اس کے بلڈوزروں نے کئی مکانات بھی منہدم کر دیے ہیں۔

کشیدگی میں مسلسل اضافہ

پچھلے کئی ہفتوں سے اسرائیلی فورسز اور فلسطینی جنگجوؤں کے درمیان جنین کے آس پاس جھڑپیں ہوتی رہی ہیں۔ بین الاقوامی مبصرین نے اس علاقے میں تشدد میں اضافے پر تشویش کا اظہار کیا ہے۔

گزشتہ ماہ اسرائیل نے جنین کے نزدیک ڈرون حملے میں تین بندوق برداروں کو ہلاک کر دیا تھا۔

اسرائیل یروشلم میں فلسطینیوں کے مکانات کیوں مسمار کر رہا ہے؟

اقوام متحدہ کے ایک ذیلی دفتر کے مطابق اس سال ہونے والے حملوں کے دوران اب تک 147 فلسطینی اور 23 اسرائیلی ہلاک ہو چکے ہیں۔

ج ا/ ص ز، م م (اے پی، اے ایف پی، ڈی پی اے، روئٹرز)