وینزویلا میں ’آپریشن فریڈم‘ شروع

خوآن گوآئیڈو نے عوام سے صدر نکولاس مادورو کی سرکاری رہائش گاہ کی جانب نکالی جانے والی ریلی میں بڑی تعداد میں شرکت کی درخواست کی ہے۔ ان کے مطابق، ’’ہم میرافلوریس کی جانب جائیں گے اور ان چیزوں کی واپسی کا مطالبہ کریں گے، جو عوام کی ملکیت ہیں۔‘‘ کاراکس میں صدارتی محل کو میرافلوریس کہتے ہیں۔

شہری ویلنسیا میں اپنے ہزاروں حامیوں سے خطاب کرتے ہوئے انہوں نے مزید کہا، ’’آج سے اس تنظیم کا ایک نیا مرحلہ شروع ہو رہا ہے۔‘‘ گوآئیڈو نے ابھی حال ہی میں کہا تھا کہ وہ اپنی اس ریلی کے لیے عوام کو متحرک کرنے کے لیے ملک کے مختلف شہروں کا دورہ کریں گے اور ویلنسیا، جو ان کا آبائی شہر بھی ہے، سے انہوں نے اس کی ابتدا کی ہے۔

خوآن گوآئیڈو نے اسے’آزادی آپریشن‘ کا نام دیا ہے۔ انہوں نے عوام سے کہا کہ وہ کمیٹیاں بنا کر خود کو منظم کریں۔ نکولاس مادورو کے حریف کی جانب سے اپنے منصوبے کے حوالے سے اہم نکات کی ایک فہرست بھی جاری کی گئی ہے، جس میں سلامتی کے اداروں کے اندر بھی اس حوالے سے تیاری کا ذکر کیا گیا ہے۔

اب تک دنیا کے پچاس سے زائد ممالک خوآن گوآئیڈو کو وینزویلا کے سربراہ مملکت کے طور پر تسیلم کر چکے ہیں۔ تاہم اس کے باوجود مادورو اپنے منصب سے ہٹنے کو تیار نہیں۔ وینزویلا گزشتہ کئی برسوں سے اقتصادی مسائل کا شکار ہے۔ اس ملک میں کساد بازاری میں اضافے کی وجہ سے اشیاء خورد نوش کی قیمتیں بہت زیادہ بڑھ چکی ہیں۔

 تاہم گزشتہ کئی ہفتوں سے جاری سیاسی بحران نے اس صورتحال کو مزید سنگین کر دیا ہے۔ وینزویلا کے مختلف علاقوں میں پانی اور بجلی کی فراہمی بری طرح متاثر ہے۔ مادرو نے اس کا الزام امریکا اور ملکی حزب اختلاف پر عائد کیا اور کہا کہ ان کی جانب سے کیے جانے والے سائبر حملے کی وجہ سے توانائی کا بحران پیدا ہوا ہے۔ اس دوران ملکی فوج نے بجلی اور پانی کے نظام کو بہتر کرنے کے لیے اپنی کارروائیوں شروع کر دی ہیں۔