پی آئی اے کی پریمئیر سروس

پی آئی اے کے ترجمان دانیال گیلانی نے ڈی ڈبلیو سے بات چیت میں کہا کہ وزیراعظم پاکستان کی خواہش تھی کہ پاکستانی مسافروں کو اعلیٰ کوالٹی کی سفری سہولیات فراہم کی جائیں۔ پہلی پرواز 14 اگست کو اسلام آباد سے لندن روانہ ہوئی تھی اور 16 اگست کو پریمئیر سروس کی لاہور سے پہلی پرواز لندن کے لیے روانہ ہوگی۔

ترجمان کے مطابق بزنس کلاس میں فلیٹ بیڈ سیٹس ہیں جبکہ اکانومی کلاس میں بھی زیادہ لیگ روم رکھا گیا ہے۔ بزنس کلاس کے مسافروں کے لیے لندن میں 25 میل تک مفت لیموزین سروس بھی فراہم کی گئی ہے۔

پی آئی اے کے مطابق اس خصوصی سروس میں کھانے کی کوالٹی کو بہتر بنایا گیا ہے۔ مسافروں کو مینو کارڈز کے ذریعے اپنی پسند کا کھانا آرڈر کرنے کی بھی سہولت دی گئی ہے۔

پی آئی اے کی اس نئی سروس میں مسافروں کے لیے بہترین انٹرٹینمنٹ فراہم کی گئی ہے اور ڈھائی سو سے زیادہ ویڈیو اور آڈیو چینلز فراہم کیے گئے ہیں۔

پریمئیر سروس کے آغاز کی تقریب میں وزیراعظم پاکستان نواز شریف مہمان خصوصی تھے۔ پی آئی اے کے نئے سی ای او کا تعلق جرمنی سے ہے۔ وہ لفتھانزا ایئر لائن میں 40 برس کام کرچکے ہیں۔ وہ چاہتے ہیں کہ جرمنی کے لیے بھی جلد پی آئی اے کی پرواز کا آغاز کیا جائے۔

اس سروس کے لیے پی آئی نے ایئر ہوسٹس کے لیے نیا یونفیارم بھی متعارف کروایا ہے۔ اس یونیفارم کو پاکستان کے مقامی ڈیزائنرز نومی انصاری اور سانیہ مسکاتیا نے ڈیزائن کیا ہے۔ یونیفارم میں نیلا، سبز اور کلیجی رنگ استعمال کیا گیا ہے۔ ٹوپی بھی اس لباس کا حصہ ہے۔ دلفریب رنگوں اورڈیزائن سے بنایا گیا دوپٹہ اس یونیفارم کو جازب نظر بناتا ہے۔

گزشتہ ماہ پی آئی اے نے سری لنکن ایئر لائن کے ساتھ تین اے 330 طیارے لیز پر لینے کے معاہدے پر دستخط کیے تھے۔ اس خصوسی سروس کے لیے استعمال کیے جانے والے طیارے کے علاوہ باقی دو طیارے فروری 2017 تک پاکستان کو دے دیے جائیں گے۔