چین کے بارے ميں معلومات کی فراہمی روک دیں گے، امریکی انتباہ

امریکا نے اپنے اہم اتحادی ملک جرمنی کو متنبہ کیا ہے کہ واشنگٹن حکومت چین سے متعلق حساس معلومات کی فراہمی کو محدود کر سکتی ہے اگر اِس یورپی اتحادی ملک نے تیز رفتار انٹرنیٹ ورک نظام  کی تنصیب کے لیے چینی کمپنیوں کا سہارا یا معاونت حاصل کی۔

یہ بیان جرمن دارالحکومت سے امریکی سفارت خانے کے بیان میں کہی گئی ہے۔ امریکی سفارت خانے کے ترجمان نے کہا کہ جرمنی میں ٹیلی کام کے شعبے میں پیشہ ورانہ خدمات مہیا کرنے والے ’ناقابل اعتماد‘ اداروں کی کوئی جگہ نہیں ہے۔ امریکی سفارت خانے کے ترجمان کے مطابق اگر ایسا ہوتا ہے تو حساس معلومات کے تبادلے پر سوالات کھڑے ہو جائیں گے۔

امریکی سفارت خانے کی جانب سے یہ بیان معتبر امریکی اخبار وال اسٹریٹ جرنل میں شائع ہونے والی رپورٹ کے تناظر میں سامنے آیا ہے، اس رپورٹ میں واضح کیا گیا ہے کہ چینی ٹیلی کام کمپنی ہواوے جرمنی میں فائیو جی انٹرنیٹ نظام کی تنصیب میں شامل کی جا رہی ہے۔

اس حوالے سے امریکی سفیر رچرڈ گرینل نے ایک خط جرمن وزیر اقتصادیات کو تحریر کیا ہے۔ اس خط میں سفیر نے لکھا ہے کہ حساس معلومات کے دو طرفہ تبادلے کا موجودہ سلسلہ اُسی صورت میں جاری رہ سکتا ہے اگر جرمن حکومت نیٹ ورک نظام کی تنصیب سے چینی کمپنیوں کو باہر کرتی ہے۔

یہ امر اہم ہے کہ جرمنی میں موبائل ٹیلی فونز کے لیے فائیو جی فریکوئنسیوں کا اجراء سال رواں کی دوسری ششماہی میں ہو گا۔ یہ بات وفاقی جرمن نیٹ ورک ایجنسی ’بی نَیٹسا‘ کی طرف سے پیر گیارہ مارچ کو بتائی گئی۔ یہ ابھی واضح نہیں کیا گیا کہ فائیو جی انٹرنیٹ نیٹ ورک نظام کی تنصیب کا کام کب شروع کیا جائے اور کیا اس عمل میں غیر ملکی کمپنیوں کو ٹھیکا دیا جائے گا۔

جرمن حکومت ان نئی اور انتہائی تیز رفتار سروسز والی فریکوئنسیوں کے ذریعے ہائی اسپیڈ موبائل ٹیکنالوجی کے صنعتی استعمال کو بہتر بنانا چاہتی ہے۔ اسی سے ملتی جلتی ایک پیش رفت میں جرمنی میں قومی سطح پر فائیو جی لائسنسوں کی نیلامی اس ماہ کی انیس تاریخ سے شروع ہو گی۔