کشمیر کی حکومت بچی کی فریاد پر غور کرنے پر مجبور ہوئی

بھارت کے زیر انتظام کشمیر کی ایک چھ سالہ بچی کا چھوٹا سا ویڈیو  سوشل میڈیا پر وائرل ہو گيا ہے جس میں اس بچی نے بھارتی وزير اعظم نریندر مودی سے سوال کیا ہے آخر کم عمر بچوں کو اتنا زیادہ ہوم ورک کیوں دیا جاتا ہے اور اسے آسان بنانے کی اپیل کی تھی۔

کشمیر کی انتظامیہ نے اس کا نوٹس لیتے ہوئے حکام سے تعلیمی پالیسی میں تبدیلی کا وعدہ کیا ہے۔  ریاستی گورنر  نے حکام کو ہدایت دی ہے کہ وہ ہوم ورک کم کرنے لیے فوری طور پر اصول و ضوابط جاری کر یں۔

ویڈیو میں کیا ہے؟

مختصر سے ویڈیو میں ایک کم سن بچی کہتی ہے، "السلام علیکم مودی صاحب: میں ایک لڑکی بول رہی ہوں، میری عمر چھ برس ہے۔ میں آپ کو زوم کلاس کی چھوٹی بڑی باتیں بول سکتی ہوں۔ چھوٹے بچے، جو چھ برس کے ہوتے ہیں، انہیں میڈم اور سر زیادہ کام کیوں دیتے ہیں؟ اتنا کام تو بڑے بچوں کو دیا جا تا ہے۔"

وہ اپنی پریشانی بیان کرتے ہوئے مزید کہتی ہیں، "میں صبح اٹھتی ہوں اور ہماری دس بجے سے دو بجے تک کلاس ہوتی رہتی ہے۔ ۔۔۔۔ پہلے انگلش، حساب پھر اس کے بعد اردو اور کمپیوٹر وغیرہ وغیرہ: اتنا زیادہ کام تو بڑے بچے رکھتے ہیں جو ساتویں یا دسویں کلاس میں ہوتے ہیں۔ چھوٹے بچوں کو اتنا کام کیوں دیتے ہیں۔"

بہت ہی معصوم اور پیارے لہجے پر مبنی اس ویڈیو کو سوشل میڈیا پر اب تک لاکھوں لوگ دیکھ چکے ہیں اور ہزاروں اسے شیئر کر رہے ہیں۔  اس پر جموں وکشمیر کی انتظامیہ کی بھی نظر پڑی ہے اور گورنر منوج سنہا نے بھی اس کا نوٹس لیا۔

انہوں نے ٹویٹر پر اس کے جواب میں لکھا کہ یہ، "بہت پیاری شکایت۔ محکمہ تعلیم کو ہدایت کر دی گئی ہے کہ وہ اسکول کے بچوں پر ہوم ورک کا بوجھ ہلکا کرنے کے لیے 48 گھنٹوں کے اندر نئی پالیسی وضع کریں۔  بچپن کی معصومیت خدا کا تحفہ ہے اور ان کے یہ دن زندہ دلی، خوشی اور مسرت سے بھر پور ہونے چاہیے۔"

اطلاعات کے مطابق مذکورہ بچی کا تعلق مرکزی کشمیر کے چادورہ علاقے سے ہے اور اسے ایک کشمیری پنڈت فیملی نے شیئر کیا تھا۔ تاہم اس کے علاوہ ابھی تک اس کی مزید تفصیلات سامنے نہیں آئی ہیں۔