کوہستان میں غیرت کے نام پر قتل کا معاملہ سپریم کورٹ میں

پاکستان کے شمال مغرب میں واقع پہاڑی علاقے کوہستان کی ان چار خواتین کی ایک ایسی ویڈیو منظر عام پر آئی ہے، جس میں وہ ایک گھر میں بیٹھی مقامی زبان میں گانا گا رہی ہیں اور ایک مقامی لڑکا رقص کر رہا ہے۔ اس ویڈیو کی عکاسی ایک دوسرے لڑکے نے اپنے موبائل فون کے ذریعے کی ہے، جو کہ رقص کرنے والے لڑکے کا بھائی بتایا جاتا ہے۔ خیبر پختونخوا کے اس قدامت پسند علاقے میں خواتین کے پردے کا بہت زیادہ خیال رکھا جاتا ہے اور اس طرح مردوں کی موجودگی میں ان کے گانے کو انتہائی غیر مناسب قرار دے کر گانا گانے والی لڑکیوں کو مبینہ طور پر قتل کر دیا گیا ہے۔ اس بات کا دعویٰ رقص کرنے والے لڑکے کے بھائی افضل خان نے کیا ہے۔ افضل خان نے پاکستانی دارالحکومت اسلام آباد میں صحافیوں کو بتایا کہ ایک قبائلی جرگے کے حکم پر ان لڑکیوں کو 30 مئی کے دن ہلاک کیا جا چکا ہے اور اب وہ اپنی اور اپنے بھائی کی جان کے لیے خطرہ محسوس کر رہے ہیں۔

خبر رساں ادارے روئٹرز کے مطابق اس واقعے نے پاکستان کے قدامت پسند معاشرے میں غیرت کے نام پر قتل کے مسئلے کو ایک مرتبہ پھر اجاگر کیا ہے۔ روئٹرز کے مطابق پاکستان میں اس قسم کی صورتحال میں خاندان، افراد یا قبیلے اکثر انصاف کا معاملہ اپنے ہاتھوں میں لے لیتے ہیں۔ روئٹرز نے اس ضمن میں جنوبی پنجاب میں مختاراں مائی سے اجتماعی زیادتی کے واقعے اور پسند کی شادی کرنے والے جوڑے کے قتل جیسے واقعات کی مثالیں پیش کی ہیں۔ ہیومن رائٹس کمیشن آف پاکستان کے اعداد و شمار کے مطابق محض گزشتہ برس غیرت کے نام پر ایک ہزار خواتین کو قتل کیا گیا۔ آزاد ذرائع کے مطابق ہلاکتوں کی درست تعداد اس سے بھی زائد ہے۔

روئٹرز کے مطابق وفاقی وزیر داخلہ رحمان ملک سے لے کر خیبر پختونخوا کی مقامی پولیس بھی کوہستان کے تازہ واقعے سے بے خبر رہی تھی۔ رحمان ملک کا گزشتہ روز کہنا تھا کہ ان کی معلومات کے مطابق ایسا کوئی واقعہ پیش نہیں آیا، ’’چیف جسٹس کا حکم درست ہے کہ اگر یہ لڑکیاں زندہ ہیں تو انہیں عدالت میں پیش کیا جائے۔‘‘

بعض ذرائع اس ویڈیو کی صحت پر بھی سوال اٹھا رہے ہیں، جس میں ان لڑکیوں کو گانا گاتے اور لڑکے کو رقص کرتے دکھایا گیا ہے کیونکہ مبینہ طور پر کسی بھی ایک فریم میں دونوں کو ایک ساتھ نہیں دکھایا گیا۔ ایک حکومتی اہلکار خالد عمرزئی نے روئٹرز کو بتایا کہ خراب موسم کے سبب گزشتہ روز کوہستان کے اس گاؤں تک رسائی ممکن نہیں ہو سکی، جہاں مبینہ طور پر یہ واقعہ پیش آیا ہے۔

(sks/ hk (Reuters