ای یو کووڈ پاس: بوسٹر کے بغیر صرف نو ماہ قابلِ استعمال

یورپی کمیشن نے منگل اکیس دسمبر کو اعلان کیا کہ کووڈ ویکسین لگوانے کے ثبوت کے طور پر دکھایا جانے والے سرٹیفیکیٹ کی مدت بوسٹر کے بغیر صرف نو ماہ کے لیے ہو گی۔ اس مدت میں اضافہ بوسٹر لگوانے سے ہی ہو گا۔

’غیر ویکسین شدہ افراد سے کرسمس پر ملاقاتیں نہیں کریں گے‘

کمیشن نے ممبر ریاستوں سے کہا ہے کہ وہ اس قانون کو اپنے اپنے ملک میں قومی سطح پر ناٰفذ کریں۔ یہ فیصلہ ایسے وقت میں کیا گیا ہے جب کووڈ انیس متعدی بیماری کی تیزی سے منتقل ہونے والے ویریئنٹ اومی کرون کے پھیلاؤ میں اضافہ دیکھا جا رہا ہے۔

یورپی یونین ویکسین سرٹیفیکیٹ کے ضوابط

نئے قانون کی منظوری کو یورپی یونین کے رکن ملکوں میں سفر اختیار کرنے کے ساتھ نتھی کیا گیا ہے۔ یورپی کمشین نے رکن ممالک سے کہا ہے کہ وہ اس قانون کے نفاذ کو یقینی بنانے پر مثبت انداز میں عمل کریں۔

یورپی یونین میں رہائش رکھنے والوں کو چھ ماہ بعد بوسٹر لگوانے کی ہدایت کی گئی ہے تا کہ وہ ہمہ وقت پوری طرح ویکسین شدہ رہیں۔ کمیشن کے مطابق کووڈ پاس کی مدت بظاہر چھ ماہ ہے لیکن اضافی تین ماہ بوسٹر لگوانے کے لیے دیے گئے ہیں۔ بوسٹر لگوانے سے کووڈ پاس کی مدتِ استعمال میں خود بخود توسیع ہو جائے گی۔

جرمنی میں اگلے سال کے شروع میں کورونا ویکسین کی قلت کا امکان

یورپی کمیشن نے بوسٹر لگوانے کو ویکسین پاسپورٹ پر اندراج کا نیا ضابطہ بھی متعارف کرایا ہے۔ دو خوراکوں کے بعد بوسٹر کے اندارج کا طریقہ "3/3" ہو گا۔ ویکسین کی ایک خوراک لگی ہو گی تو بوسٹر لگوانے کے بعد پاسپورٹ پر اندراج "2/1" ہو گا۔ یہ بھی بتایا گیا ہے کہ یونین میں اب تک آٹھ سو سات ملین ویکسین سرٹیفیکیٹ تقسیم کیے جا چکے ہیں۔

یورپ میں نئی کووڈ لہر اور پابندیوں کا امکان

یورپی یونین کے کئی رکن ممالک نے کورونا وائرس کی چوتھی لہر کے پھیلاؤ کے بعد حفاظتی اقدامات کا نفاذ کر دیا گیا ہے۔ ان میں خاص طور پر نیدرلینڈز اور آسٹریا نمایاں ہیں۔

یورپ میں کووڈ ویکسین کے خلاف مظاہروں کی حقیقت کیا ہے

فرانس میں بالغ افراد کا کووڈ پاس چھ ماہ بعد قابلِ استعمال نہیں رہے گا اور اس کو بحال کرنے کے لیے بوسٹر کا لگوانا لازمی قرار دیا گیا ہے۔ فرانس میں اس قانون کا اطلاق اگلے برس پندرہ جنوری سے ہو جائے گا۔ نیدرلینڈز نے بھی ایسے قانون کے نفاذ کا عندیہ دیا ہے۔ پرتگال، آئرلینڈ، قبرص، لٹویا، اٹلی، یونان اور آسٹریا نے بھی ہنگامی اقدامات اٹھا لیے ہیں اور ان ممالک میں بھی سفر اختیار کرنے والے افراد کا ویکسین شدہ ہونا ضروری قرار دیا گیا ہے۔

ع ح/ع ت (ڈی پی اے، اے ایف پی، روئٹرز)