یونانی جزائر پر مہاجر بچوں کی تعداد اور مشکلات دونوں بڑھ گئے

بچوں کی بہبود کے عالمی ادارے یونیسیف نے کہا ہے کہ یونانی جزائر پر مہاجر کیمپوں میں موجود بچے انتہائی ناقص حالات میں رہ رہے ہیں جو اُن پر نفسیاتی دباؤ میں اضافے کا سبب بھی ہے اور انہیں تشدد کی جانب مائل کر سکتا ہے۔ یونیسیف نے مطالبہ کیا ہے کہ مہاجر بچوں کو فوری طور پر ان جزائر سے محفوظ جگہوں پر منتقل کیا جائے۔

اس ہفتے کے آغاز میں امدادی تنظیم ’ڈاکٹرز وِد آؤٹ بارڈرز‘ نے متنبہ کیا تھا کہ موریا جزیرے پر مقیم کئی بچوں نے خود کشی یا پھر اپنے آپ کو نقصان پہنچانے کی کوشش کی ہے۔ دیگر بچوں کو ذہنی دباؤ، اور نفسیاتی بیماریوں کا سامنا ہے۔

یونیسیف کے مطابق رواں سال جنوری سے لے کر اگست تک ہر ماہ قریب ساڑھے آٹھ سو بچے سمندر کا خطرناک سفر کر کے یونانی جزائر پر پہنچے ہیں۔ گزشتہ برس یہ تعداد موجودہ تعداد کا بتیس فیصد تھی۔ عالمی ادارے نے اس اضافے کی کوئی ٹھوس وجہ تو نہیں بتائی البتہ یہ کہا کہ ان مہاجر بچوں کا تعلق شورش زدہ ممالک سے ہے۔

یونان کے لیسبوس اور سیموس جزائر کا رواں ہفتے دورہ کرنے والے یونیسیف کے نمائندے لوسیو میلاندری نے اندازہ ظاہر کیا ہے کہ آنے والے مہینوں میں مہاجرین کی آمد میں مزید اضافہ ہو گا جس کے باعث انہیں مہیا کی جانے والی سہولتیں کافی نہ ہوں گی۔

میلاندری کے مطابق،’’ حالات زیادہ خطرناک اور خراب ہو رہے ہیں۔‘‘

 لیسبوس کے موریا کیمپ میں اس وقت نو ہزار کے قریب تارکین وطن مقیم ہیں جبکہ یہاں صرف تین ہزار افراد کے رہنے کی گنجائش ہے۔ یونیسیف کا کہنا ہے کہ اس کیمپ میں بعض مہاجر بچوں کو رہتے ہوئے ایک سال سے بھی زیادہ کا وقت ہو گیا ہے جبکہ یونانی قانون کے تحت اس قیام کو پچیس دن سے زیادہ نہیں ہونا چاہیے۔

یونان سن 2015 سے مہاجرین کی آمد کا مرکزی ملک رہا ہے۔ ان میں سے زیادہ تر تارکین وطن کا تعلق مشرق وسطی اور افریقی ممالک سے ہے۔ یونیسیف کا کہنا ہے کہ اس وقت مختلف یونانی جزائر پر رہنے والے تارکین وطن کی تعداد یس ہزار پانچ سو کے قریب ہے جن میں سے بیشتر شام، عراق اور افغانستان سے ہجرت کر کے آئے ہیں۔  

صائمہ حیدر/ ش ح / نیوز ایجنسی