باخموت پر روسی فوجی قبضہ شاید چند ہی دنوں میں، نیٹو چیف

نیٹو کے سربراہ نے تنبیہ کرتے ہوئے کہا کہ روسی مسلح دستے گزشتہ کئی ماہ سے مشرقی یوکرینی علاقے دونیٹسک کے شہر باخموت پر قبضے کے لیے کوشاں ہیں مگر ابھی تک کامیاب نہیں ہو سکے۔ روسی اور یوکرینی دستوں کے مابین اس اہم شہر پر قبضے کی جنگ گزشتہ کئی دنوں سے بہت شدید ہو چکی ہے اور اس میں ماسکو کو کافی زیادہ جانی نقصان بھی ہو رہا ہے۔

باخموت پر روسی قبضے سے جنگ کا پانسہ نہیں پلٹے گا، امریکی وزیر دفاع

ماسکو کی مسلح افواج کو پچھلے سال موسم خزاں سے لے کر اب تک یوکرین کے خلاف جنگ میں کوئی بڑی کامیابی نہیں مل سکی۔ اس لیے روس کے لیے یہ بات بہت اہم ہے کہ وہ باخموت پر قبضہ کر کے اپنے طور پر یہ دکھانے کی کوشش کرے کہ اسے عسکری کامیابیاں مل رہی ہیں۔

یورپی یونین کے وزرائے دفاع کا اجلاس

اس پس منظر میں نیٹو کے سیکرٹری جنرل ژینس اسٹولٹن برگ نے سویڈش دارالحکومت سٹاک ہوم میں یورپی یونین کے رکن ممالک کے وزرائے دفاع کے ایک اجلاس کے موقع پر بدھ آٹھ مارچ کے روز کہا کہ ماسکو باخموت پر کنٹرول کے لیے اب اپنے زیادہ سے زیادہ فوجی اور عسکری ساز و سامان مشرقی یوکرینی علاقوں میں بھیج رہا ہے۔

چین نے روس کو ہتھیار دیے تو 'نتائج‘ نکلیں گے، جرمن چانسلر

اسٹولٹن برگ کے مطابق یہ بات واضح ہو چکی ہے کہ روس اس جنگ میں اب اس لیے اپنے زیادہ سے زیادہ فوجی اور ہتھیار بھیج رہا ہے کہ وہ اپنی فوجی کارکردگی میں معیار کی کمی کو تعداد کی زیادتی کے ساتھ پورا کرنا چاہتا ہے۔

روسی پیش قدمی کے بعد باخموت کے رہائشی شہر چھوڑتے ہوئے

نیٹو سربراہ نے کہا، ''روس کو بہت زیادہ جانی نقصان ہو رہا ہے مگر ساتھ ہی ہم اس بات کو بھی خارج از امکان قرار نہیں دے سکتے کہ ممکنہ طور پر ماسکو کی مسلح افواج اگلے چند روز میں باخموت پر قبضہ کر لینے میں کامیاب  ہو سکتی ہیں۔‘‘

’باخموت پر قبضہ جنگ میں کوئی نیا موڑ نہیں ہو گا‘

روسی یوکرینی جنگ میں کھل کر کییف کی مدد کرنے والے مغربی دفاعی اتحاد کے سربراہ نے سٹاک ہوم میں کہا، ''روس شاید چند ہی روز میں باخموت پر قبضہ کر لے، لیکن ساتھ ہی یہ بات بھی ذہن میں رہنا چاہیے کہ اس قبضے کا مطلب یہ نہیں ہو گا کہ اس جنگ میں کوئی ایسا نیا موڑ آ گیا ہے جو روس کے حق میں فیصلہ کن ہو سکتا ہے۔‘‘

یوکرین پر مضبوط جرمن حمایت کے لیے بائیڈن نے شولس کا شکریہ ادا کیا

ژینس اسٹولٹن برگ کے الفاظ میں، ''باخموت پر روس کے ممکنہ فوجی قبضے کی بات کرنے کا ایک مطلب یہ بھی ہے کہ ہمیں ماسکو کی عسکری صلاحیت کے بارے میں کوئی غلط اندازہ بھی نہیں لگانا چاہیے۔ تاہم ایسی کسی بھی پیش رفت سے قطع نظر نیٹو اس جنگ میں یوکرین کی مدد ہر حال میں جاری رکھے گا۔‘‘

م م / ع ت (اے ایف پی، روئٹرز)