برلینالے فلمی میلے کا آغاز

بیس فروری تک جاری رہنے والے برلینالے فیسٹیول کا شمار کینز اور وینس جیسے دنیا کے انتہائی معتبر فلمی میلوں میں ہوتا ہے۔ برلینالے کا شمار ان چند فلمی میلوں میں بھی ہوتا ہے، جو عوام کو میلے میں شرکت کی دعوت دیتے ہیں۔ لیکن اس مرتبہ کورونا وائرس کی وبا کے باعث کم افراد اس فیسٹیول میں شرکت کر پائیں گے۔

برلینالے میں فلموں کے شوز کے علاوہ عام طور پر منعقد کی جانے والی تقریبات کا انعقاد نہیں کیا جا رہا۔

'پیٹر فان کانٹ‘ کے شو میں قریب آٹھ سو مہمان شرکت کریں گے۔ فیسٹیول کے مطابق یہ فلم حسد، محبت، اور مزاح پر مبنی ہے۔ اس فلم کا شمار ان اٹھارہ فلموں میں ہوتا ہے، جو اس فیسٹیول کا سب سے اہم انعام ''گولڈن بیئر‘‘  جیتنے کی دوڑ میں شامل ہیں۔

ڈی ڈبلیو اکیڈمی کے 'جنریشن افریقہ پراجیکٹ‘ کی دو طویل دورانیے کی ڈاکومینٹریاں بھی برلینالے میں منتخب ہوئی ہیں اور وہ اس میلے میں ناظرین کو دکھائی جائیں گی۔

 جنوبی افریقہ کی غیر سرکاری تنظیم ''سٹیپس‘‘ کے ڈان ایڈکنز نے اس حوالے سے ڈی ڈبلیو کو بتایا، ''یہ کہانیاں افریقی براعظم کی ہیں اور ان کے ذریعے مہاجرت کے حوالے سے بیانیے کو تبدیل کرنے اور سینیما کی طاقت کے ذریعے حالیہ مسائل سے نمٹنے کی کوشش کی گئی ہے۔‘‘

برلینالے میں مختلف دورانیے اور موضوعات پر مبنی کل چار سو فلمیں دکھائی جائیں گی۔ اس مرتبہ بھی دنیا بھر کی نامور فلمی شخصیات اس میلے میں شرکت کر رہی ہیں۔

ب ج، ا ا (ڈی پی اے)