اربیل:امریکی فوجی اڈے کے قریب راکٹ حملہ

عراقی کردستان کے دارالحکومت اربیل میں ہوائی اڈے کے قریب واقع امریکی فوجی اڈے کو بدھ کی شام راکٹ کا نشانہ بنا یا گیا۔ اس حملے میں پہلی مرتبہ ڈرون کا استعمال کیا گیا۔ اربیل کے گورنر کا کہنا ہے ”اس حملے میں کوئی جانی یا مالی نقصان نہیں ہوا ہے۔"

جس وقت امریکی فوجی اڈے کے قریب راکٹ حملہ ہوا اسی کے آس پاس ترکی کے مشرقی شہر بشیقہ سے تقریباً پچاس کلومیٹر دور ایک فوجی اڈے پر بھی راکٹوں سے حملہ کیا گیا جس میں ایک ترک فوجی ہلاک ہوگیا۔ تاہم ان دونوں حملوں کے درمیان کسی طرح کے تعلق کی فوری طور پر تصدیق نہیں ہو سکی ہے۔

اربیل میں ہونے والا راکٹ حملہ امریکی فورسز کے خلاف ڈرون کے استعمال کا پہلا واقعہ بتا یا جا رہا ہے۔ امریکی فورسز اور بغداد میں امریکی سفارت خانے پر راکٹ حملے ہوتے رہے ہیں اور واشنگٹن ان کے لیے ایرانی حمایت یافتہ ملیشیا کو مورد الزام ٹھہراتا ہے۔

کرد خطے کے وزیر اعظم مسرور برزانی نے ترک وزیر خارجہ مولو د چاوش غلو کے ساتھ بات چیت کے بعد ایک ٹوئٹ میں کہا”ہم اربیل اور بشیقہ میں دہشت گردانہ حملوں کی شدید مذمت کرتے ہیں۔"  انہوں نے مزید کہا کہ اس واقعے کی تفتیش میں ہم ایک دوسرے کی مدد کریں گے۔

اربیل ہوائی اڈے پر ڈرون حملے کی ذمہ داری فوری طورپر کسی نے قبول نہیں کی ہے تاہم فروری میں اسی ہوائی اڈے پر اسی طرح کے حملے کا دعوی کرنے والے ایرانی نواز گروپ اولیہ الدم نے میسیجنگ ایپ ٹیلی گرام پر ایک بیان میں اس حملے کی تعریف کی ہے۔

عینی شاہدین نے بتایا کہ حملے کے بعد ہوائی اڈے جانے والے تمام راستوں پر سکیورٹی حصار لگا دیا گیا ہے۔

امریکی وزارت خارجہ کے ترجمان نیڈ پرائس نے اس حملے کی مذمت کرتے ہوئے کہا”امریکا عراقی کردستان خطے میں ہونے والے حملوں کی خبروں سے سخت ناراض ہے۔"  انہوں نے مزید کہا کہ عراقی عوام اس طرح کے تشدد کے واقعات اور اپنی خود مختاری کی خلاف ورزی سے ایک عرصے سے دو چار ہیں۔

رواں برس جنوری میں صدر جو بائیڈن کے امریکی صدارت کا عہدہ سنبھالنے کے بعد سے عراق میں امریکی فوجیوں کے اڈوں اور سفارت کاروں کی رہائش گاہوں کو نشانہ بناتے ہوئے تقریباً بیس بم یا راکٹ حملے ہو چکے ہیں۔ جب کہ پچھلے اٹھارہ مہینوں میں ایسے درجنوں حملے ہوئے ہیں۔

پندرہ فروری کو اربیل ہوائی اڈے کے اندر واقع ملٹری کمپلکس کو ایک درجن سے زائد راکٹوں سے نشانہ بنایا گیا تھا جس میں ایک عراقی شہری اور امریکی فوج کے لیے کام کرنے والا ایک غیر ملکی کانٹریکٹر مارا گیا تھا۔

 امریکا ان حملوں کے لیے ایران نواز گروپوں کو مورد الزام ٹھہراتا ہے۔ واشنگٹن اور تہران گوکہ دونوں ہی بغداد کے اتحادی ہیں تاہم ایران کے جوہری پروگرام کے حوالے سے ان میں شد ید اختلافات ہیں۔

عراق کے سابق وزیر خارجہ اوراہم کرد سیاسی رہنما ہوشیار زیباری نے اربیل حملے میں ایران نواز گروپ کے ہاتھ ہونے کا اشارہ کرتے ہوئے ایک ٹوئٹ میں کہا”ایسا لگتا ہے کہ اسی ملیشیا نے دوبارہ حملہ کیا ہے جس نے دو ماہ قبل بھی ہوائی اڈے کو نشانہ بنا یا تھا۔"

ایران نواز گروپوں نے حالیہ دنوں اپنی بیان بازی تیز کردی ہے اور ”قابض" امریکی فورسز کو نکال باہر کرنے کے لیے حملے تیز کر دینے کا اعلان کیا ہے۔ خیال رہے کہ کوئی ایک برس قبل عراقی پارلیمان نے امریکی فورسز کو ملک سے نکال دینے کی تجویز منظور کی تھی۔

امریکا نے گزشتہ ہفتے کہا تھا کہ وہ اپنی تمام افواج عراق سے نکال لے گا تاہم دونوں ملکوں کے درمیان اس حوالے کسی وقت کا تعین نہیں ہو سکا ہے۔

ج ا/ ص ز  (اے ایف پی، روئٹرز)