اسرائیل: نیتن یاہو کے خلاف مظاہرے اور استعفے کا مطالبہ

اسرائیل میں ایک حلقے کا کہنا ہے کہ جب عدالت میں نیتن یاہو کے خلاف بدعنوانی کے مقدمات کی سماعت جاری ہے تو پھر وہ حکومت کی قیادت کیسے کر سکتے ہیں۔

 اسرائیلی وزیراعظم کو اس وقت جہاں عدالت میں بدعنوانی کے مقدمے کا سامنا ہے وہیں بڑھتی بے روزگاری اور کورونا وائرس کی وبا سے نمٹنے میں ناکامی کی وجہ سے بھی عوام میں سخت ناراضگی پائی جاتی ہے۔

حالانکہ حکام نے کورونا وائرس کی وجہ سے سوشل ڈسٹینسنگ پر سختی سے عمل کرنے کی ہدایت دی تھی تاہم مظاہرین نے اس کی پرواہ نہیں کی اور  نیتن یاہو کی رہائش گاہ کے باہر نعرے بازی کی اور ہارن بجائے۔ پیر کے روز بدعنوانی کے خلاف مہم چلانے والے بہت سے کارکنان نے ان کی رہائش گاہ کے باہر اپنے خیمے نصب کر لیے تھے اور وہ اب بھی وہیں موجود ہیں۔ 

بعض مظاہرین کے پلے کارڈ پر لکھا تھا، ''نیتن یاہو کے بدعنوانی کا نقاب ہمیں بیمار کرتا ہے، نیتن یاہو استعفی دو''، ایک پلے کارڈ پر لکھا تھا، ''کرائم منسر'' یعنی مجرم وزیر اعظم۔ بہت سے لوگوں نے ایسے پوسٹر اٹھا رکھے تھے جس پر لکھا تھا، '' آپ سے کوئی ناطہ نہیں ہے ہم تنگ آچکے ہیں۔'' وہاں موجود بیشتر افراد کا یہی نعرہ تھا کہ جس سیاست داں کے خلاف عدالت میں بدعنوانی کا مقدمہ چل رہا ہو وہ حکومت کی قیادت کیسے کر سکتا ہے۔

ایک سابق اسرائیلی فوجی جنرل عامر ہسکل نے ان مظاہروں کا اہتمام کیا تھا۔ انہوں نے 14 جولائی، جس دن فرانس کے انقلاب کی 231 ویں سالگرہ تھی، کو آزادی، مساوات اور بھائی چارے کے مطالبے کے لیے عوام سے بڑی تعداد میں جمع ہونے کو کہا تھا۔ مظاہرے میں شریک ایک شخص کا کہنا تھا، ''خطرناک ترین وائرس کووڈ 19 نہیں بلکہ کرپشن ہے۔''

احتجاجی مظاہروں کے اختتام پر پولیس اور مظاہرین کے درمیان ہاتھا پائی بھی ہوتی دیکھی گئی جس کے بارے میں پولیس کا کہنا تھا کہ وہ امن و قانون کو برقرار کھنے کی کوشش کر رہی تھی۔ شام کے وقت بہت سے مظاہرین کو مرکزی یروشلم میں بھی احتجاج کرتے ہوئے دیکھا گیا جن میں سے کچھ شہر کی ریلوے لائن کو بلاک کرنے کی کوشش کر رہے تھے۔

اسرائیل میں یہ احتجاجی مظاہرے ایک ایسے دن ہورہے تھے جب وزارت صحت نے اعلان کیا تھا کہ گزشتہ 24 گھنٹوں میں کورونا وائرس کے مصدقہ 1400 مزید کیسز سامنے آئے ہیں۔ کورونا وائرس کے بحران کے دوران نتین یاہو کی حکومت نے جو معاشی پالیسیاں نافذ کی ہیں اس کے خلاف بھی گزشتہ سنیچر کو تل ابیب میں مظاہرے ہوئے تھے۔ 

اسرائیل کی مجموعی آبادی تقریبا نوے لاکھ ہے جہاں کورونا وائرس کے متاثرین کی تعداد 41 ہزار بھی زیادہ ہے اور اب تک اس وبا سے 368 افراد ہلاک ہوچکے ہیں۔ 

 نتن یاہو گزشتہ ایک عشرے سے بھی زیادہ عرصے سے اسرائیل کے وزیر اعظم ہیں لیکن گزشتہ کچھ دنوں سے ان کی مقبولیت میں کافی کمی آئی ہے۔ ناقدین کا کہنا ہے کہ وبا کے دوران انہوں نے معیشت کو کھولنے میں جلدبازی سے کام لیا جس سے کووڈ 19 سے متاثرین کی تعداد میں کافی اضافہ ہوا ہے۔

ملک میں بے روزگاری کی شرح بھی 20 فیصد سے زیادہ ہے اور ان کے مخالفین کا کہنا ہے کہ وزیراعظم لاکھوں اسرائیلوں کو روزگار فراہم کرنے میں بری طرح ناکام رہے ہیں۔

گذشتہ برس اسرائیل کے اٹارنی جنرل نے نیتن یاہو پر رشوت، فراڈ اور اعتماد کی خلاف ورزی کا الزام عائد کیا تھا۔ نیتن یاہو کے خلاف اس وقت تین مقدمات زیر التوا ہیں۔ دوسری طرف نیتن یاہو ان الزامات کی تردید کرتے ہیں۔

یہ بات قابل ذکر ہے کہ نیتن یاہو اس مرتبہ مسلسل پانچویں بار وزیراعظم منتخب ہوئے اور اس طرح انہوں نے اسرائیل کے بانی رہنما ڈیوڈ بن گورین کا ریکارڈ توڑ دیا ہے۔

ص ز/ ج ا (ایجنسیاں)