اسلام پسندوں کا چیچنیا کے دارالحکومت پر حملہ، کم از کم 20 ہلاک

روسی مسلمان علاقے چیچنیا کے دارالحکومت گروزنی میں مسلح اسلام پسندوں اور پولیس کے درمیان جمعرات کے روز مسلح جھڑپ کئی گھنٹے تک جاری رہی۔ اِس جھڑپ کو حالیہ کئی برسوں میں طویل ترین اور شدید ترین قرار دیا گیا ہے۔ اسلام پسندوں کا حملہ عین اُس دن ہوا جب روسی صدر ولادیمیر پوٹن نے قوم کے نام اپنے خطاب میں حب الوطنی کا درس دیا تھا۔ گروزنی میں ہونے والی جھڑپ میں ہونے والی ہلاکتوں کی مجموعی تعداد حکام نے بیس بتائی ہے۔ تجزیہ کاروں کے مطابق اِس جھڑپ نے روس کے حمایت یافتہ طاقتور حکمران کے اُس تاثر کو زائل کر دیا ہے کہ اسلام پسندوں کو قابو کر لیا گیا ہے۔

گروزنی پر حملہ کرنے والوں کی تعداد دس بتائی گئی ہے اور وہ شہر کی سخت سکیورٹی کو روندتے ہوئے شہر میں داخل ہوئے۔ یہ حملہ آور تین گاڑیوں پر سوار تھے۔ انہوں نے سب سے پہلے ٹریفک پولیس پر فائرنگ شروع کر دی کیونکہ انہوں نے گاڑیوں کو روکنے کی کوشش کی تھی۔ اِس فائرنگ کے تبادلے کے بعد کچھ جہادیوں نے ایک سرکاری عمارت میں داخل ہو کر امدادی پولیس کے دستوں کو روک دیا۔ فائرنگ کے تبادلے کے دوران پولیس نے علاقے کا محاصرہ کر کے بقیہ شہر سے کاٹ دیا تھا۔ یہ حملہ جمعرات کی علی الصبح کیا تھا۔

اِس حملے میں دس منزلہ پریس ہاؤس تباہ ہو کر رہ گیا۔ مقامی ذرائع ابلاغ کی عمارت میں جھڑپ کے دوران آگ لگ گئی تھی۔ عمارت کو لگنے والی آگ قریبی گلیوں میں بھی پھیل گئی۔ اسی دوران بعض حملہ آور بھاگتے ہوئے ایک خالی اسکول میں گُھس گئے۔ گروزنی کی پولیس اور حملہ آوروں کے درمیان بارہ گھنٹے تک جھڑپ جاری رہی۔ اِس دوران پولیس نے چُن چُن کر تمام دس جہادیوں کو ہلاک کر دیا۔ اس شدید جھڑپ میں دس پولیس اہلکار بھی مارے گئے۔ دیگر 28 پولیس اہلکار زخمی بتائے گئے ہیں۔ گروزنی کی پولیس نے حملہ آوروں کے خلاف دستی بم بھی استعمال کیے۔ حملے کے اختتام پر روسی صدر نے چیچینیا کے حکمران رمضان قادیروف سے ملاقات کے دوران حملہ آوروں کو شکست دینے کے آپریشن کی تعریف بھی کی۔

روس کے شورش زدہ مسلمان جمہوریاؤں میں سرگرم جہادیوں کے لیے وقف ویب سائٹ قفقاذ سینٹر نے ایک ویڈیو پیغام جاری کیا ہے اور اُس میں ایک شخص اِس حملے کی دمہ داری قبول کرتے ہوئے کہتا ہے کہ یہ حملہ امیر خامزات کے حکم پر کیا گیا تھا۔ امیر خامزات چیچنیا کے جنگی سردار اسلان بیاُتُوکیئف (Aslan Byutukayev) کی عُرفیت ہے۔ اِس ذمہ داری کے اعلان بارے ماسکو اور گروزنی کے حکومتی حلقوں نے کوئی بیان جاری نہیں کیا ہے۔ یہ امر اہم ہے کہ چیچنیا کے کئی اسلام پسند شام اور عراق میں اسلامک اسٹیٹ کے دستوں میں شامل ہیں۔ اسلامک اسٹیٹ نے بھی روس پر حملوں کا اعلان کر رکھا ہے۔