افغانستان میں امریکی فوجیوں کی جانیں بچانے کا نیا سامان

مغربی دُنیا گزشتہ کچھ عرصے سے افغانستان میں غیر ملکی فوجیوں کی ہلاکتوں میں اضافے سے پریشان ہے۔ ان میں سے بیشتر ہلاکتیں سڑک کے کنارے نصب دیسی ساختہ بموں سے ہوئی ہیں۔ رواں سال اب تک 340 سے زائد غیر ملکی فوجی مارے جا چکے ہیں، جن میں ایک سو سے زائد گزشتہ ماہ مارے گئے۔

امریکی حکام کے مطابق یہ بم امونیم نائٹریٹ سے یہ بم بنائے جاتے ہیں، جو پاکستان میں کھاد کے طور پر زراعت کے شعبے میں استعمال ہوتی ہے۔

امریکی نائب وزیر دفاع برائے ٹیکنالوجی اور لوجسٹک ایشٹن کارٹر کے بقول نئے سامان میں نئی بکتر بند گاڑیاں اور بارودی سرنگوں کا کھوج لگانے والے روبوٹس بھی شامل ہیں۔ ان کا کہنا ہے کہ یہ سامان اور بم ناکارہ بنانے والے ایک ہزار ماہرین، جاسوس اور سیکیورٹی اہلکار اگلے ماہ جنگ زدہ ملک پہنچ جائیں گے۔

امریکی نائب وزیر نے واضح کیا کہ یہ نیا سامان افغان اور اتحادی فورسز کے ساتھ مل کر استعمال کیا جائےگا۔

اب یہ بھی اطلاعات ہیں کہ افغان آرمی کو طالبان عسکریت پسندوں پر قابو پانے کے لئے سابق وزیر اعظم گلبدین حکمت یار کے جنگجوؤں کی معاونت بھی حاصل ہو چکی ہے۔ یہ سابق حکومت مخالف گروہ ملک کے شمالی صوبوں بغلان اور قندوز میں طالبان کے سرکردہ کمانڈوں کی سرگرمیوں سے افغان آرمی کو مطلع رکھتا ہے۔

شمالی افغانستان میں ملکی فوج کےکمانڈر مراد علی مراد کے بقول معلومات کے تبادلے کا یہ سلسلہ بہت اچھے طریقے سے چل رہا ہے اور بہت کامیاب ہے۔

حزب اسلامی کا شمار پہلے حکومت مخالف تین بڑے گروہوں میں ہوتا تھا۔ ان میں سے دو یعنی جنوب و مشرقی افغانستان میں حقانی گروپ اور جنوب میں طالبان اب بھی حکومت کے لئے درد سر بنے ہوئے ہیں۔ طالبان اور حزب اسلامی میں اس بنیاد پر اختلاف ہے کہ طالبان اس وقت تک کابل حکومت سے مذاکرات کے حق میں نہیں جب تک کہ غیر ملکی فوجی افغانستان سے چلے نہیں جاتے۔ حزب اسلامی کا مؤقف ہے کہ اگر غیر ملکی فوج کے انخلاء کا ٹائم ٹیبل واضح کر دیا جائے تو وہ مذاکرات کے لئے تیار ہیں۔

شمالی افغانستان میں اتحادی افواج کی کمان پہلے محض جرمن فوج تک محدود تھی۔ جرمن قانون کے مطابق ان کی افواج جارحانہ رویہ اختیار کر کے کسی پر حملہ آور نہیں ہوسکتیں اور اسی نکتے کو شمال میں عسکریت پسندی کے پنپنے کی وجہ سمجھا جا رہا تھا۔ اب البتہ علاقے میں امریکی افواج بھی آ چکی ہیں، جو عسکریت پسندوں کے خلاف زیادہ سرگرمی سے کارروائیاں کر رہی ہیں۔

رپورٹ: شادی خان سیف

ادارت: امجد علی