امریکا اور ایران اسلامک اسٹیٹ کے خلاف مشترکہ میدان کی تلاش میں، جائزہ

روئٹرز کے مطابق یہ ممالک مشرق وسطیٰ میں زیادہ تر معاملات میں اختلافات کے باوجود اب عراق اور شام کے ایک وسیع علاقے پر قابض سنی شدت پسندوں کی سرگرمیوں کی روک تھام کے حوالے سے ایک متفقہ نکتہء نظر کے حامل ہیں۔ حالاں کہ امریکا ایران پر واضح کر چکا ہے کہ وہ اسلامک اسٹیٹ کے خلاف اقدامات فرقہ ورانہ بنیادوں کی بجائے عراقی اور شامی عوام کے تحفظ کے ارادے سے کرے۔

روئٹرز کے مطابق ’میرے دشمن کا دشمن میرا دوست ہے‘ کی کہاوت پرانی ہے، تاہم مشرق وسطیٰ کی موجودہ صورت حال میں یہ محاورہ بہت حد تک صادق آتا ہے، جہاں برسوں کی عدوات کے حامل امریکا اور ایران اب سنی شدت پسندوں کے پیش قدمی کے تناظر میں ایک ہی صفحے پر دیکھے جا سکتے ہیں، اس کے باوجود دونوں ممالک ایک دوسرے کے ساتھ براہ راست تعاون کرتے نظر نہیں آتے۔

تاہم ماہرین کا یہ بھی کہنا ہے کہ ایران اور امریکا کا اس صورت میں بھی بہت زیادہ قریب آنا، خاصا مشکل دکھائی دیتا ہے۔

امریکی صدر باراک اوباما نے اسلامک اسٹیٹ کے خطرے سے نمٹنے کے لیے ایک عالمی اتحاد کا اعلان کیا، تو اس میں بھی ایران کو شامل نہیں کیا گیا۔ دوسری جانب ایران نے بھی اس سلسلے میں دو ٹوک الفاظ میں کہہ دیا کہ وہ امریکی قیادت میں اس عالمی اتحاد کا حصہ بننے کا کوئی ارادہ نہیں رکھتا۔

روئٹرز کے مطابق امریکا کے موجودہ اور سابقہ حکام اس بات کو تسلیم کرتے ہیں کہ اسلامک اسٹیٹ کے خطرات اور مشرق وسطیٰ کی سلامتی کے لیے امریکا اور ایران کو مل کر کام کرنا چاہیے، تاکہ اس سلسلے میں ایرانی کردار زیادہ سے زیادہ حد تک مثبت ہو۔

ماضی میں ریپبلکن اور ڈیموکریٹک دونوں جماعتوں کی حکومت میں مشرق وسطیٰ کے خطے کے لیے بطور مشیر کام کرنے والے ڈیوڈ مِلر کے مطابق، ’ایرانی فوجی عراق اور شام میں موجود ہیں، تاہم ہمارے فوجی زمینی کارروائیوں میں شامل نہیں۔ وہ لازمی طور پر اس صورت حال میں ایک فریق ہیں، تاہم اس پر ہمیں فکرمند ہونے کی بھی ضرورت ہے۔‘

امریکی ماہرین کے مطابق اس سلسلے میں ایران کے ساتھ مل کر کام نہ کرنے کی ایک وجہ یہ ہے کہ اسلامک اسٹیٹ کو شکست دینے کے لیے اقدامات میں ایک دوسرے کے خلاف لڑائی شروع نہ ہو جائے اور دوسری وجہ یہ کہ اس سے ایک دوسرے کو نیچا دکھانے کا معاملہ بھی پیدا نہیں ہو گا۔