امریکا ایران پر سے پابندیاں نہیں ہٹائے گا: جو بائیڈن

امریکی صدر جو بائیڈن نے اتوار کے روز اس امر کی تصدیق کی کہ ایران جب تک جوہری معاہدے کی شرائط کی پابندی نہیں کرتا ہے اس وقت تک اس کے خلاف عائد پابندیاں ختم نہیں کی جائیں گی۔

ٹیلی ویزن نیٹ ورک سی بی ایس کے ساتھ ایک انٹرویو میں جب بائیڈن سے پوچھا گیا کہ کیا امریکا ایران کو مذاکرات کی میز پر واپس لانے پر آمادہ کرنے کی غرض سے اس کے خلاف ”پہلے پابندیاں ختم"کردے گا تو انہوں نے واضح انداز میں جواب دیا''نہیں"۔

جب ان سے مزید پوچھا گیا ”اگر ایرانی پہلے یورینیم کی افزودگی روک دیتے ہیں تو کیا وہ پابندیاں ہٹا دیں گے"  اس پر صدر بائیڈن نے سر ہلاکر ہاں میں جواب دیا۔

سابق امریکی صدر ڈونلڈ ٹرمپ کی جانب سے سن 2018 میں امریکا کو سن 2015 کے جوہری معاہدے سے الگ کرلینے کے بعد سے تہران نے جوہری معاہدے کی پاسداری ختم کردی تھی دوسری طرف واشنگٹن نے ایران پر دوبارہ پابندیاں عائد کردی تھیں۔

 ایران نے جوہری معاہدے کی رو سے صرف 3.76 فیصد یورینیم افرودہ کرنے کی حد کو توڑتے ہوئے جنوری میں 20 فیصد یورینیم افزودہ کرنا شروع کر دیا تھا۔

گزشتہ ماہ بائیڈن کے امریکی صدر کا عہدہ سنبھالنے کے بعد امریکا اور ایران دونوں نے سن 2015 کے جوہری معاہدے کو بحال کرنے میں دلچسپی ظاہر کی تھی تاہم دونوں اپنی اپنی شرطوں پر زور دے رہے ہیں۔

’پہلے امریکا پابندیاں ختم کرے‘

ایران کے رہبر اعلی آیت اللہ علی خامنہ ای نے اتوار کے روز کہا ”اگر وہ چاہتے ہیں کہ ایران معاہدے پر واپس آئے تو امریکا کو عملی طور پر تمام پابندیاں ختم کرنی ہوں گی"۔ ان کا کہنا تھا کہ ”جب تمام پابندیوں کے درست طور پر خاتمے کی تصدیق ہوگی تو پھر ہم تمام وعدوں پر واپس آئیں گے، یہ فیصلہ حتمی اور ناقابل واپسی ہے اور اس پر ایران کے تمام عہدیداروں کا اتفاق ہے۔"

ایرانی سپریم لیڈر کا کہنا تھا ”ایران نے معاہدے میں شامل تمام شرائط پوری کی ہیں لیکن امریکا اور یورپی ممالک نے ایسا نہیں کیا۔"

خامنہ ای کا یہ بیان اتوار کے روز اسی دن آیا ہے جب یمن کے لیے امریکا کے خصوصی سفیر نے یمن میں جاری جنگ کا سیاسی حل تلاش کرنے کی امریکی کوششوں کے تحت تہران کا دورہ کیا۔ بیشتر تجزیہ کاروں کا خیال ہے کہ یمن کی جنگ دراصل ایران اور سعودی عرب کے مابین بالواسطہ جنگ ہے۔

ج ا /ص ز (روئٹرز،اے ایف پی)