امریکی صدر برطانیہ میں، دو طرفہ مذاکرات اور عوامی مظاہرے

امریکی صدر ڈونلڈ ٹرمپ نے برطانیہ کے تین روزہ سرکاری دورے کے دوران وزیراعظم ٹریزا مے سے کہا کہ وہ امریکی برطانوی تجارتی سمجھوتے کو حتمی شکل دینے کی کوشش کریں۔ ٹرمپ نے اس ڈیل کو دونوں ملکوں کے لیے انتہائی اہم قرار دیا۔ یہ امر اہم ہے کہ ٹرمپ کی واپس روانگی کے دو ہی دن بعد یعنی جمعہ سات جون کو ٹریزا مے منصبِ وزارت عظمیٰ سے مستعفی ہو جائیں گی۔

برطانوی دارالحکومت ميں اخباری نمائندوں سے بات چيت کرتے ہوئے امريکی صدر ڈونلڈ ٹرمپ نے کہا ہے کہ مغربی دفاعی اتحاد نيٹو کے رکن ممالک کو اپنا دفاعی بجٹ بڑھانا ہی ہوگا، اس کے علاوہ ان کے پاس کوئی چارہ نہيں۔ انہوں نے يہ بيان برطانوی وزير اعظم ٹيريزا مے سے ملاقات کے بعد ديا۔

ٹرمپ کا ايک عرصے سے مطالبہ رہا ہے کہ کئی رکن ممالک، جو اپنی مجموعی قومی پيداوار کا دو فيصد نيٹو کے ليے ادا نہيں کرتے، انہيں مقررہ دو فيصد ادا کرنا چاہيے۔ اپنے تين روزہ دورہٴ برطانيہ ميں ٹرمپ نے منگل چار جون کو مختلف سياسی شخصیات اورکاروباری اداروں کے سربراہان کے ساتھ ملاقاتوں کا سلسلہ جاری رکھا۔

روايتی اعتبار سے امریکی صدور برطانیہ کی داخلی پالیسیوں پر کوئی رائے زنی نہیں کرتے لیکن ٹرمپ اس روایت سے بہت دور ہیں۔ ٹریزا مے کے بعد انہوں بورس جانسن کو برطانوی وزیراعظم کے منصب کا اہل قرار دیا۔ اس کے علاوہ بریگزٹ پر بھی ان کے خیالات سامنے آ چکے ہیں۔ انہوں نے بریگزٹ کی حامی سیاسی جماعت کے لیڈر نائجل فراج کو بھی مذاکراتی عمل میں شریک کرنے کو اہم قرار دیا۔

منگل چار جون کے بعد، پانچ جون بروز بدھ سے امریکی صدر دوسری عالمی جنگ کے ’ڈی ڈے‘ کی تقریبات میں شریک ہوں گے۔ چھ جون سن 1944 کے ڈی ڈے کی تقریبات برطانوی شہر پورٹ اسمتھ میں ہو رہی ہیں۔ اسی مقام سے اتحادی افواج نے جارح قوتوں کے خلاف عملی اقدامات شروع کیے اور پھر انگلش چینل کو عبور کرتے ہوئے مغربی یورپ پر دوبارہ قبضہ حاصل کرنے کے علاوہ نازی حکومت کو شکست سے دوچار کیا تھا۔ اس خصوصی دن کی تقریبات میں فرانسیسی صدر ایمانوئل ماکروں بھی شریک ہوں گے۔

امریکی صدر ڈونلڈ ٹرمپ کے برطانوی دورے کے دوران کئی برطانوی شہروں میں ٹرمپ مخالف مظاہروں کا سلسلہ بھی جاری ہے۔ لندن میں ٹرافیلگر اسکوائر پر ہونے والے احتجاج میں ہزاروں افراد شريک ہوئے۔ گزشتہ روز ہی صدر ٹرمپ اور لندن کے میئر صادق خان کے درمیان سخت جملوں کا تبادلہ بھی ہوا تھا۔ صادق خان نے اپنی ٹویٹس میں برطانوی حکومت پر تنقید کی تھی کہ اسے صدر ٹرمپ کے لیے ریڈ کارپٹ نہیں بچھانا چاہیے تھا جبکہ اپنی ایک جوابی ٹوئیٹ میں ٹرمپ نے لندن کے میئر کو ایک 'شکست خوردہ' شخص قرار دیا تھا۔