انسانوں کو چاند پر لے جانے کے منصوبے کا اعلان

خلائی پروازیں طویل عرصے تک حکومتوں ہی کے زیر انتظام رہی ہیں تاہم حالیہ برسوں میں یہ سلسلہ تجارتی بنیادوں پر بھی شروع ہوا ہے، جس کے نتیجے میں نجی کمپنیاں پہلی مرتبہ مدار میں راکٹ بھیجنے میں کامیاب رہیں۔

ناسا نے اخراجات کم کرنے کی امید پر 2011ء میں اپنی خلائی شٹلز کو ریٹائرڈ کر دیا تھا اور اس کے بجائے روسی خلائی جہازوں کے ذریعے بین الاقوامی خلائی اسٹیشن پر سامان اور عملہ پہنچایا۔ حال ہی میں امریکی خلائی ادارے نے اسپیس ایکس کے زیر انتظام کارگو خلائی جہاز کے ذریعے بھی سامان پہنچایا۔

ناسا کی جانب سے مالی وجوہات کی بناء پر زمین کے مدار سے آگے نظام شمسی کو مزید دریافت کرنے کے لیے عملے کی بجائے روبوٹس کو بھیجا جانے لگا تھا۔

نجی خلائی پروازوں کے نئے سلسلے میں گولڈن اسپائیک کمپنی شامل ہو رہی ہے، جس کے تحت انسان کو ایک مرتبہ پھر چاند پر پہنچایا جائے گا۔

اس کمپنی کا اندازہ ہے کہ چاند کے ایک راؤنڈ ٹرِپ پر ڈیڑھ ارب ڈالر خرچ ہوں گے، جو اس رقم کے تقریباﹰ برابر ہے، جو حکومتی خلائی پروگرام کے تحت وہاں روبوٹ بھیجنے پرخرچ ہوتی ہے۔

گولڈ اسپائیک کا کہنا ہے کہ دستیاب راکٹوں اور عملے کے لیے بنائے گئے نئے تجارتی جہازوں سے استفادہ کرتے ہوئے اخراجات کم کیے جا سکتے ہیں۔

اس کمپنی کا کہنا ہے کہ نجی پروازیں مختلف ملکوں، افراد اور ایسی کمپنیوں کو فروخت کی جائیں گی، جو چاند کی تحقیق کا مقصد اور جذبہ رکھتے ہیں۔ کمپنی کے مطابق اس پر اٹھنے والے خرچ کا جو اندازہ لگایا گیا ہے، وہ چاند کے کسی بھی مشن پر خرچ ہونے والی رقم کا محض ایک چھوٹا سا حصہ ہے۔

گولڈن اسپائیک اپنے اس منصوبے پر گزشتہ دو برس سے کام کر رہی ہے اور اس کا اعلان اپالو 17مشن کے افتتاح کے چالیس برس مکمل ہونے پر کیا گیا ہے، جو چاند پر انسان کو لے جانے والا اب تک کا آخری مشن تھا۔

اس کمپنی کو چلانے والے دو افراد میں سے ایک اپالو کے سابق فلائٹ ڈائریکٹر جیری گریفن ہیں، جو ناسا کے جانسن اسپیس سینٹر کی قیادت بھی کر چکے ہیں جبکہ دوسرے ایک سائنسدان اور ناسا کے سابق سائنس چیف ایلن اسٹرن ہیں۔

اس کمپنی کے مشیروں میں امریکی ایوانِ نمائندگان کے سابق اسپیکر نیوٹ گنگرچ اور نیو میکسیکو کے سابق گورنر بِل رچرڈسن سمیت اعلیٰ سیاستدان بھی شامل ہیں۔

ng/aa (AFP)