انڈونیشیا میں نو عمری کی شادیاں تنقید کی زد میں

گزشتہ ہفتے انڈونیشیا کے ایک جزیرے پر  ہوئی 14 سالہ دلہن اور 15 سالہ دولہا کی شادی کی آن لائین ویڈیو منظر عام پر آنے کے بعد انڈونیشیا کے صدر پر زور دیا جا رہا ہے کہ اس حوالے سے ملکی قوانین پر نظر ثانی کریں۔

اس کم عمر جوڑے نے ابتدائی طور پر ملک کے مذہبی امور کے دفتر سے شادی کی اجازت طلب کی تھی جس کے مسترد ہونے کے بعد جوڑے نے ایک مذہبی عدالت سے رجوع کیا جس کی اجازت کے بعد شادی کی تقریب معنقد کی گئی۔  اس تقریب کی ویڈیو سامنے آنے کے بعد سوشل میڈیا پر ایک اور ویڈیو سامنے آئی جس میں اسی عمر کے ایک اور کم عمر جوڑے کی شادی ہوتے ہوئے دیکھا جا سکتا ہے۔

انڈونیشیا میں خواتین کے حقوق کے لیے کام کرنے والی ایک کارکن اور وکیل نائلہ ذکیہ  نے ڈوئچے ویلے سے بات کرتے ہوئے کہا کہ ملکی صدر سے انڈونیشیا میں کم عمری کی شادی کے خاتمے کا مطالبہ کیا گیا ہے۔ ذکیہ ان 18 خواتین میں سے ایک ہیں، جنہیں  صدارتی محل میں ملاقات کے لیے 20 اپریل کو دعوت دی گئی تھی۔ ان خواتین نے اس ملاقات میں جن تین معاملات کی جانب صدر کی توجہ دلائی ان میں کم عمری کی شادی، خواتین کے خلاف جنسی تشدد اور جنسی جرائم سے متعلق قوانین میں ترمیم شامل ہے۔ ذکیہ کے مطابق صدر جوکو ویدودو نے کم عمری کی شادی سے متعلق مطالبے پر اپنا رد عمل ظاہر کرتے ہوئے والدین کی مرضی سے شادی کی عمر لڑکیوں کے لیے 20 سال اور لڑکوں کے لیے 22 سال مقرر کرنے پر آمادگی کا اظہار کیا۔

’لڑکيوں کی کم عمری ميں شادی اور غلامی کا تعلق‘

دنیا بھر میں بارہ ملین بچیوں کی کمسنی میں شادیاں، یونیسف

واضح رہے کہ یونیسیف اور انڈونیشیا کی حکومت کی جانب سے سامنے آنے والی ایک مشترکہ رپورٹ کے مطابق 255 ملین افراد پر مشتمل دنیا کی سب سے بڑی مسلم آبادی والے اس ملک میں ایک اندازے کے مطابق 17 فیصد لڑکیوں کی 18 برس کی عمر سے قبل ہی شادی ہو جاتی ہے۔  اگر ان اعداد وشمار کا مقابلہ دیگر ممالک مثلاﹰ بنگلہ دیش جہاں  74 فیصد اور نائجر جہاں کی 76 فیصد لڑکیوں کی شادیاں کم عمری میں ہوئیں انڈونیشیا سے کیا جائے تو پھر یہاں کم عمری کی شادیوں سے متعلق اعدوشمار کم محسوس ہوتے ہیں، تاہم زیادہ آبادی کے باعث کم عمری کی شادیوں کی تعداد یہاں زیادہ ہے۔ یونیسف کی رپورٹ کے مطابق انڈونیشیا میں 20 سے 24 برس کی ایسی خواتین کی تعداد 1,408,000 ہے جن کی شادی 18 برس کی عمر سے قبل ہی ہوئی۔ جبکہ ہر سال 50 ہزار کے قریب ایسی شادیاں ہوتی ہیں جن میں لڑکی کی عمر 15 سال سے کم ہوتی ہے۔

ع ف/ ا ب ا (چارلی شیلڈ، ڈی ڈبلیو)