میرکل نے کونراڈ آڈیناؤر فاؤنڈیشن سے بھی علیحدگی اختیار کر لی

کونراڈ آڈیناؤر فاؤنڈیشن کے ایک ترجمان کی طرف سے اس بات کی تصدیق کر دی گئی ہے کہ جرمنی کی سابق چانسلر انگیلا میرکل نے گزشتہ ہفتے ہونے والی میٹنگ میں یہ بات واضح کر دی کہ وہ اس فاؤنڈیشن کے معاملات چلانے والے 55 رکنی بورڈ کے لیے یا ارکان کی آئندہ ملاقاتوں کے لیے دستیاب نہیں ہوں گی۔

میرکل چار مرتبہ چانسلر کے عہدے پر تعینات رہنے کے بعد 2021ء میں اقتدار سے الگ ہوئیں۔ حالیہ کچھ عرصے کے دوران سیاسی اسٹیج سے مکمل علیحدگی کے سلسلے میں ان کا یہ تازہ قدم ہے۔ تاہم اس تھنک ٹینک کی طرف سے یکم دسمبر کو اس کے چیئرمین نوربرٹ لامیرٹ کے دوبارہ انتخاب کے سلسلے میں جاری کی گئی پریس ریلیز میں اس بات کا کوئی ذکر نہیں کیا گیا تھا کہ اس فاؤنڈیشن کی سب سے مشہور رکن اس سے الگ ہونے والی ہیں۔

اس فاؤنڈیشن کی طرف سے اس بات کی تصدیق جرمنی کے ڈیئر اشپیگل نامی ہفتہ وار میگزین میں خبر چھپنے کے بعد کی گئی ہے۔

کونراڈ آڈیناؤر فاؤنڈیشن ہے کیا؟

کونراڈ آڈیناؤر اسٹفٹنگ (کے اے ایس) ایک ایسا تھنک ٹینک ہے جو براہ راست جرمن سیاسی جماعت کرسچن ڈیموکریٹک پارٹی سے منسلک ہے تاہم قانونی وجوہات کی بنا پر یہ آزادانہ حیثیت میں کام کرتا ہے۔ اس کی بنیاد 1955ء میں رکھی گئی تھی اور اس کا نام دوسری عالمی جنگ کے بعد کے کرسچن ڈیموکریٹک پارٹی کے پہلے جرمن چانسلر کونراڈ آڈیناور کے نام پر رکھا گیا تھا۔

جرمنی کی ہر ایسی بڑی جماعت جو پارلیمان میں نمائندگی رکھتی ہے وہ اس طرح کے ادارے قائم کر سکتی ہے اور تقریباﹰ تمام جماعتوں کی ایسی فاؤنڈیشنز موجود بھی ہیں۔

بنیادی طور پر ان اداروں کو ریاست فنڈنگ مہیا کرتی ہے۔ ان کا مقصد ملک کے اندر اور ملک سے باہر سیاسی تعلیم اور تحقیق کا فروغ اور اس بارے میں آگاہی پھیلانا ہے۔ یہ ادارے ایک طرح سے اپنی اپنی سیاسی جماعت کے سیاسی ایجنڈا کی تیاری اور اسے آگے بڑھانے میں اہم کردار ادا کرتے ہیں۔

ا ب ا/ع س (ڈی پی اے، اے ایف پی)