’ایران کی جوہری پالیسی میں کوئی تبدیلی نہیں آئی ہے‘

تہران نے بدھ کو یقین دہانی کرائی کہ اس کی جوہری پالیسی میں کوئی تبدیلی نہیں ہوئی اور وہ اب بھی بڑے پیمانے پر تباہی پھیلانے والے ہتھیاروں پر پابندی کے فتوے پر قائم ہے۔

گزشتہ 18 مہینوں میں یہ دوسرا موقع ہے کہ ایران نے کسی اہلکار کے تبصرے کے بعد جوہری ہتھیاروں کی مخالفت کا اعادہ کیا ہے۔

وزارت خارجہ کے ترجمان ناصر کنانی نے کہا، ''وسیع پیمانے پر تباہی پھیلانے والے ہتھیاروں کے موضوع کے حوالے سے، ہمارے پاس ایران کے سپریم لیڈر کا فتویٰ یا مذہبی فتویٰ موجود ہے جو اس طرح کے ہتھیاروں کی تیاری پر پابندی لگاتا ہے۔‘‘

فتویٰ میں ایٹم بموں اور بڑے پیمانے پر تباہی پھیلانے والے دیگر ہتھیاروں کے استعمال کو ''حرام‘‘ یا اسلام کی طرف سے حرام قرار دیا گیا ہے، اور اسے اکثر ایرانی حکام تہران کے نیک ارادوں کی ضمانت کے طور پر پیش کرتے رہے ہیں۔

کنانی نے ایک نیوز کانفرنس میں کہا کہ ایسا لگتا ہے کہ جوہری پالیسی کے حوالے سے اسلامی جمہوریہ ایران کے نقطہ نظر اور موقف میں کوئی تبدیلی نہیں آئی ہے۔

نئی جوہری ڈیل مسترد کر سکتے ہیں، اسرائیلی وزیر اعظم

'ایٹم بم سازی‘ کے بارے میں تبصرہ

ایران کے وزارت خارجہ کے ترجمان ناصر کنانی کا یہ بیان دراصل ایران کی 'اسٹریٹجک کونسل آف فارن ریلیشنز‘  کے سربراہ کمال خرازی کی جانب سے اتوار کے روز الجزیرہ کو ایران کی جوہری ہتھیاروں کی تیاری کی صلاحیت کے بارے میں دیے گئے تبصروں کے جواب میں سامنے آیا ہے۔

خرازی نے ایران کے اس موقف کو دہرانے سے پہلے، کہ وہ جوہری بم نہیں بنانا چاہتا، کہا کہ ''یہ کسی کے لیے راز نہیں ہے کہ ہمارے پاس ایٹم بم بنانے کی تکنیکی صلاحیت موجود ہے، لیکن ہم نے اس حوالے سے کوئی فیصلہ نہیں کیا ہے۔‘‘

 بدھ کے روز میڈیا سے بات کرتے ہوئے کنانی کا کہنا تھا،''ایران کی جوہری صلاحیت بہت مستحکم ہے، لیکن جیسا کہ اس نے کئی بار ذکر کیا ہے، ایران کی جوہری ٹیکنالوجی مکمل طور پر پُرامن مقاصد کے لیے ہے اور (اقوام متحدہ کی) بین الاقوامی جوہری توانائی ایجنسی کی مسلسل نگرانی میں ہے۔ یہ ریمارکس ایران اور مغربی طاقتوں کے درمیان بڑھتی ہوئی کشیدگی کے درمیان سامنے آئے ہیں جب کہ 2015 ء کے جوہری معاہدے کو بحال کرنے کے لیے ویانا میں ہونے والی بات چیت مارچ سے تعطل کا شکار ہے۔

واضح نہیں کہ ایران ایٹمی معاہدے کی بحالی چاہتا ہے یا نہیں، امریکا

قطر مذاکرات کا میزبان

خلیجی ریاست قطر نے گزشتہ ماہ امریکہ اور ایران کے درمیان بالواسطہ مذاکرات کی میزبانی کی تھی تاکہ اس عمل کو دوبارہ بحال کیاجا سکے لیکن یہ بات چیت دو دن کے بعد بغیر کسی پیش رفت کے ختم ہو گئی۔ ویانا مذاکرات، جو گزشتہ سال اپریل میں شروع ہوئے تھے، کا مقصد امریکہ کو جوہری معاہدے کی طرف لوٹنے پر آمادہ کرنا ہے۔ جس میں ایران پر سے پابندیاں ہٹانا بھی شامل ہے، اور تہران پر بھی اپنے وعدوں کی تکمیل  کے لیے زور دینا ہے۔ 2015 ء کے معاہدے نے ایران کو اس کے جوہری پروگرام پر پابندیوں کے بدلے میں پابندیوں میں ریلیف دی تھا تاکہ اس بات کی ضمانت دی جا سکے کہ تہران جوہری ہتھیار تیار نہیں کر سکتا تاہم اس نے ہمیشہ اس امر کی تردید کی ہے۔

لیکن اُس وقت کے امریکی صدر ڈونلڈ ٹرمپ کے دور میں 2018 ء میں اس معاہدے سے امریکہ کی یکطرفہ دستبرداری اور ایران پر اقتصادی پابندیوں کے دوبارہ نفاذ کے بعد رد عمل کے طور پر ایران نے اپنے وعدوں سے پیچھے ہٹنا شروع کر دیا۔

منگل کو امریکی محکمہ خارجہ کے ترجمان نیڈ پرائس نے کہا کہ امریکی صدر جو بائیڈن نے ''یہ عہد کیا ہے کہ ایران جوہری ہتھیار حاصل نہیں کر پائے۔‘‘

انہوں نے مزید کہا کہ ''ہم اس بات پر یقین رکھتے ہیں کہ ان مقاصد کے حصول کے لیے سفارت کاری سب سے موثر اور پائیدار ذریعہ۔‘‘

ایرانی جوہری سائنسدان تختہ دار پر چڑھا دیے گئے

ایران کا دیرینہ موقف

فروری 2021 ء میں، ایران نے جوہری ہتھیاروں کی مخالفت کا اعادہ کیا جب اس وقت کے ایرانی  انٹیلی جنس کے وزیر محمود علوی نے کہا تھا کہ اگرایران کو کبھی جوہری بم بنانے کی طرف ''دھکیلا‘‘ گیا تو اس میں اسلامی جمہوریہ کی غلطی نہیں ہوگی۔

ایران نے اپنے جوہری پروگرام پر بحران کے وقت 2010ء میں پہلی بار متن کو عام کرنے سے پہلے برسوں تک فتویٰ کی موجودگی کا دعویٰ کیا تھا۔ اس وقت تہران پر عالمی برادری، خصوصاً مغرب اور اسرائیل نے خفیہ طور پر ایٹم بم حاصل کرنے کی کوشش کرنے کا الزام لگایا تھا۔

ک م / ب ج) اے ایف پی(