ایرانی تنصیبات کو تباہ کرنے کے لیے تین ہزار پاؤنڈ وزنی بم موجود ہے، امریکا

امریکی جنرل نے کہا کہ یہ بم گزشتہ سال فوج کے حوالے کیا گیا تھا اور یہ ان ملکوں کے خلاف استعمال کیا جا سکتا ہے جنہوں نے ایران کی طرح زمین کی گہرائی میں جوہری تنصیبات بنا رکھی ہیں۔

جنرل ہربرٹ کارلائل نے واشنگٹن میں امریکی دفاعی پروگراموں کے بارے میں ایک کانفرنس سے خطاب کرتے ہوئے  کہا، ’یہ بہت بڑا بم ایک عظیم ہتھیار ہے۔ ہم اسے بہتر بنانے کے لئے کوشاں ہیں۔ یہ اس وقت امریکی ہتھیاروں میں شامل ہے اور اگر ضرورت پڑی تو ہم اسے استعمال کریں گے۔‘

جنرل کار لائل کے مطابق شام یا ایران کے ساتھ تنازعے کی صورت میں امریکی فوجی کارروائیاں پینٹاگون کی اس نئی سوچ سے متاثر ہو کر کی جائیں گی، جسے فضائی اور سمندری لڑائی کہا جا رہا ہے۔

اس حکمت عملی کے تحت فضا اور سمندر کے علاوہ خلا اور سائبر اسپیس سے بھی کارروائیاں کی جائیں گی جن میں سیٹلائٹوں کے علاوہ خفیہ طیاروں اور بغیر پائلٹ کے جہازوں کا استعمال بھی شامل ہیں۔

ایران کے اپنے متنازعہ جوہری پروگرام پر عالمی طاقتوں کے ساتھ کشیدگی بڑھ رہی ہے تاہم سفارت کاری کی سرگرمیاں بھی جاری ہیں۔ رواں ہفتے کے اوائل میں امریکی صدر باراک اوباما نے اسرائیلی وزیر اعظم بینجمن نیتن یاہو سے ملاقات کے دوران کہا تھا کہ یروشلم ایران کے معاملے پر تحمل کا مظاہرہ کرے۔ تاہم امریکی صدر نے یہ بھی کہا کہ اگر سفارت کاری اور پابندیوں نے اثر نہ دکھایا تو تہران کے خلاف عسکری کارروائی کا امکان بھی کھلا ہے۔

سیکرٹری دفاع لیون پینیٹا نے جمعرات کو نیشنل جرنل کو ایک انٹرویو میں بتایا تھا کہ ان کے خیال میں اسرائیل نے ایرانی جوہری تنصیبات پر حملے کا فیصلہ ابھی نہیں کیا ہے۔ انہوں نے یہ بھی کہا کہ امریکا ایران کو جوہری ہتھیاروں کے حصول سے روکنے کے لیے پر عزم ہے۔

عالمی طاقتوں کا خیال ہے کہ ایران اپنے جوہری پروگرام کی آڑ میں جوہری ہتھیار بنانے پر کام کر رہا ہے جبکہ تہران کا کہنا ہے کہ اس کا جوہری پروگرام صرف پر امن مقاصد کے لیے ہے۔

رپورٹ: حماد کیانی / خبر رساں ادارے

ادارت: امتیاز احمد