ایرانی جوہری معاہدہ، جرمن وزیر خارجہ اپنے موقف پر ڈٹ گئے

جرمن وزیر خارجہ ہائیکو ماس اپنے اوّلین دورہ امریکا کے دوران واشنگٹن میں ہیں۔ ایرانی جوہری معاہدے سے امریکی انخلاء کے بعد یہ دورہ ان کے لیے آسان نہیں ہے کیونکہ اس دوران ان کی تمام ملاقاتوں میں اسی موضوع پر بات کی جائے گی۔

امریکی کانگریس کے ارکان سے ملاقات کے دوران ہائیکو ماس نے اس تناظر میں جرمنی کا موقف واضح کیا، ’’جرمنی میں اور یورپی سطح پر بھی ہم پر عزم اور متحد ہیں کہ اس جوہری معاہدے کو بچانے کے لیے تمام تر کوششیں بروئے کار لائی جائیں اور ایران سے بھی اس کی پاسداری کرائی جائے۔‘‘ انہوں نے مزید کہا، ’’یہ سلامتی سے متعلق ہمارے مفادات کے حق میں ہے۔ ہم اپنے دور کے پڑوسیوں میں جوہری ہتھیاروں کا پھیلاؤ نہیں چاہتے۔‘‘

 امریکا کے علاوہ اس معاہدے پر دستخط کرنے والے تمام دیگر ممالک روس، چین، برطانیہ، فرانس اور جرمنی اس معاہدے کو برقرار رکھنے کے حق میں ہیں۔ ماس نے امریکی کانگریس کے ارکان سے اپنی ملاقات میں اسی موقف کو دہراتے ہوئے کہا کہ گزشتہ ہفتے صوفیہ میں ہونے والے یورپی سربراہی اجلاس میں بھی اس موضوع کے حوالے سے یورپی سطح پر اتفاق نظر آیا۔

جرمن وزیر خارجہ ہائیکو ماس آج بدھ 23 مئی کو اپنے امریکی ہم منصب مائیک پومپیو سے ملاقات کر رہے ہیں۔ اس کے بعد وہ امریکی صدر ڈونلڈ ٹرمپ کے مشیر برائے سلامتی امور جان بولٹن سے بھی ملیں گے۔ یہ دونوں ایران کے حوالے سخت موقف رکھتے ہیں۔ مائیک پومپیو جرمن وزیر سے ملاقات سے قبل اس امید کا اظہار کر چکےہیں کہ امریکا یورپی ممالک کے ساتھ مل کر اس تنازعے کا کوئی سفارتی حل تلاش کر لے گا۔