ایردوآن نے کولون میں جامع مسجد کا افتتاح کر دیا

جرمن شہر کولون میں اس مسجد کے افتتاح کے موقع پر ترک صدر رجب طیب ایردوآن کا کہنا تھا کہ انہیں مسلمانوں کے لیے دیگر جرمن شہروں میں بھی مساجد دیکھ کر خوشی ہو گی۔ ایردوآن نے اس موقع پر کہا، ’’یہ جامع مسجد لاکھوں ترک باشندوں کے لیے تمکنت اور فخر کا باعث ہے۔‘‘

میرکل ایردوآن ملاقات لیکن ’ فاصلہ برقرار‘

یورپ کی سب سے بڑی مساجد میں ایک اور کا اضافہ

مسجد کے افتتاح کی تقریب کے موقع پر وہاں قریب دس ہزار افراد موجود تھے۔ ایردوآن نے اس اجتماع سے خطاب میں کہا، ’’روشن خیال لوگ جو یہاں جمع ہیں، یہ کسی دہشت گردی کا حصہ نہیں بنیں گے۔‘‘

کولون شہر میں تعمیر کی گئی اس جامع مسجد کا انتظام ترک جرمن اسلامی تنظیم DITIB کے پاس ہو گا۔ یہ بات اہم ہے کہ ترک صدر رجب طیب ایردوآن سے قریبی تعلق کی بنا پر اس جرمن تنظیم پر بھی کڑی تنقید کی جاتی ہے۔

ترک صدر ایردوآن نے جمعے کے روز سے اپنا سرکاری دورہ جرمنی شروع کیا تھا۔ اس دورے کے آغاز پر ان کا استقبال فوجی اعزاز کے ساتھ کیا گیا، جب کہ ان کی میزبانی ان کے جرمن ہم منصب فرانک والٹر اشٹائن مائر نے کی۔ اس دورے کے دوران وہ جرمن چانسلر انگیلا میرکل سے بھی ملاقات کر چکے ہیں۔

ایردوآن یہ دورہ ایک ایسے موقع پر کر رہے ہیں، جب ترکی اور جرمنی کے تعلقات نہایت کشیدہ ہیں۔ ترکی میں سن 2016ء میں ہونے والی ناکام فوجی بغاوت کے بعد سے جاری کریک ڈاؤن پر جرمن حکومت شدید تحفظات کا اظہار کرتی ہے۔ جرمن رہنما اس ناکام بغاوت کے بعد صدر ایردوآن کی جانب سے بے انتہا انتظامی اختیارات اپنے ہاتھوں میں لینے کو بھی ’آمرانہ طرز حکومت‘ قرار دیتے ہیں۔ اس دورے کے آغاز سے قبل تاہم ترک صدر ایردوآن نے اس امید کا اظہار کیا تھا کہ دونوں ملکوں کے درمیان تعلقات کا ایک نیا باب شروع کیا جائے گا۔