ایمن الظواہری پاکستان میں، پینٹاگون کا دعویٰ

مصری نژاد جنگجو رہنما اور اسامہ بن لادن کے جانشین ایمن الظواہری کی طرف سے اس کا نیا ویڈیو پیغام سامنے آنے کے بعد پینٹاگون حکام نے ایک مرتبہ پھر اپنے اس مؤقف کو دہرایا ہے کہ الظواہری ابھی تک پاکستان میں ہی کہیں روپوش ہے۔ پینٹا گون کے ترجمان جارج لِٹل نے بدھ کو کہا کہ انہیں ایسی کوئی اطلاعات نہیں ہیں کہ ایمن الظواہری پاکستان کے علاوہ کسی اور جگہ ہو سکتا ہے۔

قبل ازیں منظر عام پر آنے والی 62 منٹ دورانیے کی ایک نئی ویڈیو میں دہشت گرد گروپ القاعدہ کے نئے سربراہ  ایمن الظواہری نے کہا کہ وہ دعا گو ہے کہ ’عرب ممالک میں بہار‘ کہلانے والی بڑی سیاسی تبدیلیاں اور عوامی انقلابات امریکہ کے لیے اداسی اور سردیوں کے ایک بہت سخت موسم میں بدل جائیں۔

الظواہری کے مطابق نائن الیون کی طرح عرب ممالک کے انقلابات بھی امریکہ کی شکست ہیں۔ القاعدہ کے اس نئے لیڈر کے بقول افغانستان اور عراق میں غیر ملکی فوجیوں کی مبینہ ناکامی بھی امریکہ کی بڑی شکست ہے۔

بتایا گیا ہے کہ منگل کو انٹرنیٹ پر شائع کی گئی اس نئی ویڈیو میں الظواہری کی ایک تصویر دکھائی گئی ہے، جس کے پیچھے اس کی آواز سنائی دیتی ہے۔ امریکی نیٹ مانیٹرنگ سروس SITE کے مطابق اسی ویڈیو پیغام میں اسامہ بن لادن کی ایک تقریر بھی شامل ہے۔

پینٹاگون حکام نے کہا ہے کہ اس نئی ویڈیو میں اسامہ بن لادن کی فوٹیج بظاہر وہی معلوم ہوتی ہے، جو انہوں نے پاکستانی شہر ایبٹ آباد میں اسامہ کے گھر پر چھاپے کے دوران حاصل کی تھی۔ اس خفیہ فوجی کارروائی میں امریکی کمانڈوز نے اسامہ بن لادن کو ہلاک کر دیا تھا۔

بن لادن کی ہلاکت کے بعد القاعدہ کے نمبر دو ایمن الظواہری کو اس دہشت گرد تنظیم کا سربراہ بنا دیا گیا تھا۔ امریکہ میں نائن الیون کے حملوں کے بعد جب واشنگٹن نے دہشت گردی کے خلاف جنگ کا اعلان کیا تھا تو اس وقت سے ہی ایمن الظواہری بھی دیگر انتہا پسند رہنماؤں کی طرح روپوش ہے۔ امریکی حکام کا کہنا ہے کہ وہ پاکستان ہی میں کہیں موجود ہے جبکہ اسلام آباد حکومت ایسے دعووں کو مسترد کرتی ہے۔

رپورٹ: عاطف بلوچ

ادارت: مقبول ملک