’ایک ہی مہینے میں 122 عالمی رہنماؤں کی جاسوسی‘

جرمن نیوز میگزین ڈیراشپیگل نے ہفتے کو ایک رپورٹ شائع کی ہے جس کے مطابق مئی 2009ء میں نیشنل سکیورٹی ایجنسی (این ایس اے) نے 122 عالمی رہنماؤں کی جاسوسی کی۔ اشپیگل نے یہ رپورٹ این ایس اے کےسابق ملازم ایڈورڈ سنوڈن کی فراہم کردہ معلومات کے حوالے سے دی ہے۔

خبر رساں ادارے ڈی پی اے کے مطابق این ایس اے نے اس ایک مہینے میں جاسوسی کا نشانہ بننے والے رہنماؤں کے ناموں کی ایک فہرست مرتب کی تھی جس میں جرمن چانسلر انگیلا میرکل سے لے کر یوکرائن کی سابق وزیر اعظم یولیا تیموشینکو تک متعدد رہنما شامل تھے۔

اشپیگل نے سنوڈن کی فراہم کردہ ایک دستاویز کے حوالے سے بتایا ہے کہ این ایس اے میں میرکل کے حوالے سے تین سو سے زائد فائلیں رکھی گئی تھیں۔

اشپیگل کے مطابق اسے ملنے والی دستاویز میں بارہ رہنماؤں کے نام شامل ہیں جن میں سے ایک ملائیشیا کے سابق وزیر اعظم عبداللہ بداوی بھی ہیں۔

خبر رساں ادارے اے ایف پی کے مطابق اشپیگل کا کہنا ہے کہ این ایس اے کی یہ فائلز جرمن عدلیہ کے لیے ایک اہم ثبوت ہو سکتی ہیں جو آنے والے دِنوں میں اس بات کا فیصلہ کرے گی کہ آیا جاسوسی کے مشتبہ اسکینڈل کی تحقیق کی جائے یا نہیں۔

گزشتہ برس سامنے آنے والی ایک رپورٹ کے مطابق این ایس اے مبینہ طور پر میرکل کے موبائل فون کی نگرانی بھی کرتی رہی ہے۔ این ایس اے کی جانب سے جاسوسی کے انکشاف پر امریکا اور برلن کے تعلقات میں کشیدگی پیدا ہوئی تھی۔

جرمنی کی گرین پارٹی کے ہانس کرسٹیان شٹرؤبیلے نے روس میں سنوڈن سے ملاقات بھی کی تھی۔ وطن واپسی پر وہ سنوڈن کا ایک خط بھی ساتھ لائے تھے۔

ایڈورڈ سنوڈن جاسوسی کے پروگرام پرزم کا انکشاف کرنے پر امریکا کو مطلوب ہیں۔ اس پروگرام کے بارے میں معلومات ذرائع ابلاغ کو دینے کے بعد وہ ہانگ کانگ فرار ہو گئے تھے۔ وہاں سے وہ گزشتہ برس جون میں ماسکو پہنچے تاہم امریکا کی جانب سے شہریت کی منسوخی کی وجہ سے مزید سفر نہ کر سکے اور ماسکو ایئرپورٹ کے ٹرانزٹ زون میں ہی ٹھہرے رہے۔ اگست میں روس نے انہیں ایک سال کے لیے سیاسی پناہ دے دی تھی۔