بریگزٹ امور کے نگران برطانوی وزیر ڈیوڈ ڈیوس مستعفی

برطانوی دارالحکومت لندن سے پیر نو جولائی کو موصولہ نیوز ایجنسی روئٹرز کی رپورٹوں کے مطابق مقامی میڈیا نے لکھا ہے کہ ڈیوڈ ڈیوس، جو بریگزٹ کے حوالے سے سخت گیر سوچ کے حامل سیاستدان ہیں، ملکی وزیر اعظم ٹریزا مے کے موقف سے اختلاف کرتے ہوئے ماضی قریب میں کئی بار اپنی ذمے داریوں سے مستعفی ہو جانے کی دھمکی دے چکے تھے۔ تاہم اس مرتبہ وہ واقعی اپنی ذمے داریوں سے علیحدہ ہو گئے ہیں۔

روئٹرز کے مطابق ڈیوڈ ڈیوس نے، جو بریگزٹ سے متعلقہ معاملات طے کرنے کے لیے یورپی یونین کے ساتھ مذاکرات میں برطانیہ کے اعلیٰ ترین مندوب بھی تھے، وزیر اعظم ٹریزا مے کے نام اپنے ایک خط میں لکھا ہے کہ وہ ملکی وزیر اعظم کے ’ڈیفنس کیڈٹ‘ کے طور پر کام نہیں کر سکتے۔

اس سے چند ہی روز قبل ٹریزا مے نے اعلان کیا تھا کہ وہ اپنی پوری کابینہ کو اس بارے میں اپنا ہم نوا بنانے میں کامیاب ہو گئی ہیں، کہ برطانیہ کے یورپی یونین سے انخلاء کا پروگرام کیا ہو گا۔ نیوز ایجنسی ڈی پی اے کے مطابق ڈیوس کے مستعفی ہو جانے کے فیصلے سے اب ٹریزا مے کا بطور وزیر اعظم مستقبل بھی خطرے میں پڑ گیا ہے، اور وہ بھی لندن میں ملکی کابینہ کے اس فیصلے کے محض 48 گھنٹے کے اندر اندر کہ یونین کے ساتھ مستقبل کے اقتصادی روابط سے متعلق ایک تجویز منظور کر لی جائے گی۔

مے حکومت کی اس بارے میں تجویز یہ تھی کہ لندن برسلز میں یورپی یونین کی قیادت کو یہ پیشکش کرے گا کہ بریگزٹ کے بعد بھی یورپی یونین اور برطانیہ ایک آزاد تجارتی معاہدے پر عمل پیرا رہ سکتے ہیں۔ برطانوی کابینہ میں یہ تجویز بہت متنازعہ تھی اور ڈیوڈ ڈیوس کے استعفے میں بھی اسی متنازعہ تجویز نے فیصلہ کن کردارا دا کیا۔

ڈی پی اے نے لکھا ہے کہ ڈیوس نے مے کے نام اپنے خط میں لندن کی اب تک کی بریگزٹ پالیسی کو ’مسائل سے بھرپور‘ قرار دیا، جس پر عمل درآمد کی صورت میں نہ صرف لندن کی برسلز کے ساتھ مذاکرات میں پوزیشن بہت کمزور ہو جائے گی بلکہ ساتھ ہی اس سے برطانیہ کی ساکھ بھی متاثر ہو گی۔

ساتھ ہی ڈیوڈ ڈیوس نے یہ بھی لکھا کہ لندن حکومت نے بریگزٹ سے متعلقہ حمتی فیصلوں کے لیے ’ملکی پارلیمان کو اختیار دینے کی جو بات کی ہے، وہ حقیقت سے زیادہ ایک دھوکا‘ ہے، جس کے بعد ’برطانوی معیشت کے کئی حصے لندن حکومت کے دعووں کے برعکس یورپی یونین ہی کے اختیار میں‘ رہیں گے۔

وزیر اعظم ٹریزا مے کے لیے سیاسی طور پر کافی حد تک بے چینی کا سبب ڈیوڈ ڈیوس کا اپنے خط میں یہ لکھنا بھی ہے، ’’برطانیہ کے قومی مفادات اس بات کے متقاضی ہیں کہ میرے عہدے پر ایک وزیر کی حیثیت سے کسی ایسی شخصیت کو فائز کیا جائے، جو آپ (وزیر اعظم مے) کی سوچ کا پرجوش حامی ہو، نہ کہ میری طرح محض ناچاہتے ہوئے ہی آپ کی سوچ پر عمل پیرا ہو۔‘‘

برطانوی اخبار ڈیلی ٹیلیگراف کے مطابق اسی اختلاف رائے کے باعث صرف ڈیوڈ ڈیوس ہی مستعفی نہیں ہوئے بلکہ لندن میں بریگزٹ امور کی وزارت کے ایک جونیئر وزیر اسٹیو بیکر بھی اپنے عہدے سے دستبردار ہو گئے ہیں۔

م م / ا ا / روئٹرز، ڈی پی اے