بشریٰ بی بی کی بنی گالہ سے جیل منتقلی کی درخواست منظور

 اسلام آباد ہائی کورٹ نے بدھ کو سابق وزیر اعظم عمران خان کی اہلیہ کی طرف سے گھر سے جیل منتقل کیے جانے کی درخواست منظور کر لی ہے۔

حکومت کی طرف سے سکیورٹی خدشات کی بنا پر بشریٰ بی بی کو بنی گالہ میں ان کے گھر پر نظربند رکھا گیا تھا۔ جنوری میں غیر قانونی طور پر سرکاری تحائف فروخت کرنے کے الزامات سے متعلق توشہ خانہ کیس میں عمران خان اور ان کی اہلیہ کو سزا سنائے جانے کے بعد سے بشریٰ بی بی بنی گالہ میں اپنے گھر پر نظر بند تھیں۔

انہوں نے جیل کی بجائے گھر میں اپنی نظر بندی کو چیلنج کر رکھا تھا۔ اسلام آباد ہائی کورٹ کے جسٹس میاں گل حسن اورنگزیب نے اس مقدے کا فیصلہ سنایا۔ عدالت نے گزشتہ ہفتے فریقین کے دلائل سننے کے بعد بشریٰ بی بی کی درخواست پر فیصلہ محفوظ کیا تھا۔

پاکستان تحریک انصاف نے ایک بیان میں کہا کہ بشری بی بی کو راولپنڈی کی اڈیالہ جیل منتقل کرنے کا حکم دیا گیا ہے، جہاں ان کے ستر سالہ شوہر اور سابق وزیر اعظم عمران خان  اپنی 14 سال قید کی سزا کاٹ رہے ہیں۔ پی ٹی آئی کے مطابق بشریٰ بی بی نے گھر میں حکام کی طرف سے زہر ملا کھانا فراہم کرنے کی شکایت کی تھی۔ عمران خان نے بھی الزام عائد کیا تھا کہ ان کی اہلیہ کو بنی گالہ میں کھانے میں زہر دیا جا رہا ہے تاہم عدالتی حکم پر ان دونوں کے میڈیکل ٹیسٹ کروائے گئے اور جیل حکام کے مطابق عمران خان اور بشریٰ بی بی کے معائنے کی رپورٹس درست ہیں اور ان میں کسی قسم کا کوئی مسئلہ نہیں۔

 ش ر⁄ ک م (روئٹرز)