بنڈس لیگا کا 24 واں میچ ڈے مکمل
28 فروری 2011
بنڈس لیگا کے 24 ویں میچ ڈے کے سلسلے میں اتوار کے روز دو مقابلے ہوئے۔ ویردر بریمن بنڈس لیگا کے موجودہ سیزن میں کمزور ترین ٹیموں میں شمار ہونے کے باوجود بہترین ٹیموں میں سے ایک لیورکوزن کے ساتھ میچ دو دو گول سے برابر کرنے میں کامیاب ہوگئی۔ اس میچ کی برابری کے باوجود لیورکوزن کی دوسری پوزیشن تو برقرار ہے تاہم ٹیم کے کوچ Jupp Heynckes اس صورتحال سے ناخوش نظر آئے۔
" ٹیم یقینی طور پر شدید دلبرداشتہ ہے۔ انہیں ایک فاتح کے طور پر میدان چھوڑنا چاہیے تھا، کیونکہ ہم نے 70 منٹوں تک بریمن پر مکمل برتری قائم رکھی۔ ہم نے دو پوائنٹس کھو دیے، کیونکہ ہم نے میچ کے آخری منٹوں میں سمجھداری کا مظاہرہ نہیں کیا،" کوچ نے کہا۔
اس سے قبل اتوار کے روز کھیلے گئے پہلے میچ میں اشٹٹ گارٹ نے فرینکفرٹ کو صفر کے مقابلے میں دو گول سے شکست دی۔ کھیل کے 15 منٹ میں اشٹٹ گارٹ کے کپتان Mathieu Delpierre کی طرف سے فاؤل کے بعد انہیں میدان سے باہر بھیج دیا گیا۔ اشٹٹ گارٹ نے زیادہ تر میچ 10 کھلاڑیوں سے کھیلنے کے باوجود اس میچ میں فتح حاصل کی۔
24 ویں میچ ڈے کے سلسلے میں ہفتے کے روز چھ میچ کھیلے گئے۔ ہفتے کے روز کھیلے گئے ایک اہم میچ میں بوروسیا ڈورٹمنڈ نے دفاعی چیمپیئن بائرن میونخ کو ایک کے مقابلے میں تین گول سے شکست دے دی ہے۔ بائرن میونخ کو شکست دینے کے بعد لیگ میں پہلے نمبر پر براجمان کلب ڈورٹمنڈ کی پوزیشن مزید مضبوط ہوگئی ہے۔ اسے پوائنٹس ٹیبل پر دوسری پوزیشن پر موجود ٹیم لیور کوزن سے اب 12 پوائنٹس کی برتری حاصل ہے۔
ہفتے کے روز کھیلے جانے والے ایک اور اہم میچ میں ہینوور نے سینٹ پاؤلی کو صفر کے مقابلے میں ایک گول سے شکست دی۔ اس فتح کے باعث ہنوور کا کلب پوائنٹس ٹیبل پر چوتھی سے تیسری پوزیشن پر پہنچ گیا جبکہ بائرن میونخ اب چوتھی پوزیشن پر ہے۔
ہفتے ہی کے روز کھیلے گئے دیگر میچوں میں کولون نے فرائی برگ کو ایک صفر سے جبکہ مائنز نے ہوفن ہائم کوایک کے مقابلے میں دوگول سے ہرایا۔ کائزرزلاؤٹرن اور ہیمبرگ کے علاوہ شالکے اور نیورمبرگ کے درمیان کھیلے گئے میچ ایک ایک گول سے برابر رہے۔
24 ویں میچ ڈے کے سلسلے میں جمعہ کے روز کھیلے گئے واحد میچ میں وولفس برگ نے مؤنشن گلاڈ باخ کو ایک کے مقابلے میں دو گول سے شکست دی تھی۔
ہفتے کے روز کھیلے گئے میچوں کے بعد بنڈس لیگا پوائنٹس ٹیبل کی صورتحال کچھ یوں ہے۔ پہلی پوزیشن بوروسیا ڈورٹمنڈ کے پاس ہے اور اسے 58 پوائنٹس حاصل ہیں۔ دوسری پوزیشن پر بائرلیورکوزن کی ٹیم ہے اور اس کے پاس 46 پوائنٹس ہیں۔ ہنوور کی ٹیم 44 پوائنٹس کے ساتھ چوتھی سے اب تیسری پوزیشن پر آگئی ہے۔ بنڈس لیگا کی دفاعی چیمپیئن بائرن میونخ کے پاس 42 پوائنٹس ہیں اور یہ اب چوتھی پوزیشن پر پہنچ گئی ہے جبکہ مائنز کی ٹیم 40 پوائنٹس حاصل کرکے پانچویں پوزیشن پر ہے۔
رپورٹ: افسراعوان
ادارت: شامل شمس