بچوں کا جنسی استحصال ’انسانوں کی قربانی‘ کے مساوی ہے، پوپ

پاپائے روم نے کليسا سے منسلک پادريوں کے ہاتھوں بچوں کے جنسی استحصال کے مسئلے سے نمٹنے کے ليے عزم کا اظہار کيا ہے۔ ويٹيکن سٹی ميں اس موضوع پر چار روزہ بڑے پادریوں یا کارڈینلز کے اجلاس کے اختتام پر اتوار 24 فروری کو پوپ فرانسس نے کہا کہ کليسا کی جانب سے ايسے مسائل پر پردہ ڈالنے کی روايت ختم کی جائے گی۔ پوپ نے پادريوں کے ہاتھوں بچوں کے جنسی استحصال کو ’انسانوں کی قربانی‘ سے تعبير کيا اور اسے ايک گھناؤنا فعل قرار ديا۔ کيتھولک مسيحيوں کے روحانی پيشوا نے مزيد کہا کہ آئندہ سامنے آنے والے ايسے واقعات سے کافی سنجيدگی سے نمٹا جائے گا۔

ويٹيکن سٹی ميں چار روزہ سمٹ جمعرات اکيس فروری سے جاری تھی۔ اس سربراہی اجلاس ميں دنيا بھر سے کيتھولک کليسا کے سرکردہ پادریوں نے حصہ ليا۔ اطلاعات کے مطابق سمٹ ميں تقريباً دو سو گرجا گھروں کے سربراہان سميت سو سے زائد بشپس اور عورتوں کے مذہبی گروپوں کے نمائندگان نے شرکت کی۔ اس سمٹ ميں زير بحث مسئلے کا تين زاويوں سے جائزہ ليا گيا جن ميں ذمہ داری، احتساب اور شفافيت شامل تھے۔ آخری دن پاپائے روم نے ايک خصوصی دعائيہ تقريب کی قيادت بھی کی۔ اس اجلاس کا مقصد پادريوں کے ہاتھوں بچوں کے جنسی استحصال کے بارے ميں آگہی پھيلانا اور کليسا ميں اصلاحات متعارف کرانا تھا۔

کيتھولک کليسا کے ارکان کے جنسی عوامل کا نشانہ بننے والے اور ان کے ليے سرگرم گروپوں کے نمائندے بھی ويٹيکن سٹی ميں اس سمٹ کے موقع پر جمع ہوئے اور انہوں نے احتجاج جاری رکھا۔ متاثرين سمٹ کے نتيجے سے غير مطمئن ہيں۔ دوسری جانب پوپ فرانسس نے اپنی اختتامی تقرير ميں کافی سخت الفاظ ميں ايسے متنازعہ عوامل کی مذمت کی تاہم اصلاحات کا کوئی ذکر نہ کيا۔ تاہم پوپ نے يہ بھی کہا کہ بچوں کے جنسی استحصال کے انسداد کے ليے اصل کام سمٹ کے بعد ہو گا۔

ع س / ع ح، نيوز ايجنسياں