بکنی باٹمز کی بجائے جانگیے، ناروے کی کھلاڑیوں پر جرمانہ

یوروپی ہینڈبال فیڈریشن کے مطابق اس کی نظم و ضبط کی کمیٹی 'نامناسب لباس‘ کے تناظر میں تادیبی کارروائی کے اس واقعے کی چھان بین کر رہی ہے۔  ناروے کی ٹیم کو کانسی کے تمغے کے لیے اسپین کے مدمقابل میچ میں یہ جرمانہ عائد کیا گیا۔  یہ خواتین کھلاڑی بکنی کے ساتھ کا نہایت چھوٹا سترپوش استعمال کرنے کی بجائے جانگیے استعمال کرنا چاہتی تھیں۔

’خواتین چست لباس نہ پہنیں‘: متنازعہ بینرز ہٹائے جائیں، عدالتی حکم

’مسلم خواتین کو ’برقینی‘ پہننے کی اجازت ہونا چاہیے‘

فیڈریشن کے بیان میں کہا گیا ہے کہ یہ جرمانہ بیچ ہینڈبال کھیل کے کھلاڑیوں کے یونیفارم سے جڑے ضوابط کے تحت کیا گیا ہے۔ ناروے کی فیڈریشن نے تاہم فی کھلاڑی ڈیڑھ سو یورو جرمانے پر تنقید کی ہے، جب کہ ناروے کہ وزیر کھیل عابد راجہ نے اسے 'مکمل فضول‘ قرار دیتے ہوئے رویے میں تبدیلی کی ضرورت پر زور دیا ہے۔

ناورے کی ہینڈبال فیڈریشن نے ٹوئٹر پر اپنے بیان میں کہا کہ وہ ان خواتین کی طرف سے جرات کا مظاہرہ کرنے اور بس بہت ہو گیا کے واضح اشارے کو فخر کی نگاہ سے دیکھتے ہیں۔ ''ہم  اور ناروے کی ہینڈبال فیڈریشن آپ کے ساتھ کھڑے ہیں اور آپ کی مدد کرتے ہیں۔ ہم مل کر یونیفارم سے متعلق ضوابط کو تبدیل کرنے آپ کی مدد کریں گے، تاکہ کھلاڑی اس لباس میں کھیلیں جس میں وہ اچھا محسوس کرتے ہیں۔‘‘

واضح رہے کہ بیچ ہینڈبال کھیل کے ضوابط کے مطابق خواتین کھلاڑیوں کو ٹاپ اور بکنی باٹمز پہننا ہوتا  ہے، جب کہ مردوں کے لیے شرٹ کے ساتھ جانگیے کی شرط ہے۔

ع ت، ع ب (روئٹرز)