بھارت ميں زندہ مچھلی کھانے کا میڈیسن فیسٹیول

ہر سال جون کے مہینے میں دمے کے مریض حیدر آباد شہر میں جمع ہوتے ہیں، جہاں انہیں پیلے رنگ کے ایک ہربل پیسٹ کے ساتھ ایک طرح کی مچھلی نگلنے کو دی جاتی ہے۔ ناک بند کی، منہ کھولا اور زندہ مچھلی نگل لی۔

دمے کے مرض میں مبتلا یہ افراد اس امید پر یہ مچھلی نگل لیتے ہیں کہ شايد اب انہیں سانس کی تکلیف سے آرام مل جائے۔

پانچ سینٹی میٹر لمبی بل کھاتی مُرل مچھلی جب ان مریضوں کے حلق سے اترتی ہے تو بیشتر افراد قے کرنے پر مجبور ہو جاتے ہیں۔

حیدر آباد میں ’بٹھینی گوڑ‘ خاندان ایک صدی سے زیادہ عرصے سے اس علاج سے منسلک ہے۔ تاہم اس خاندان نے اس طریقہ علاج کا وہ خفیہ فارمولہ بتانے سے انکار کیا ہے جو بقول اُن کے سن 1845 میں اُن کے آباؤ اجداد کو ایک ہندو سادھو نے دیا تھا۔

اکثر چھوٹے بچوں کو جب یہ دوا پلائی جاتی ہے تو اُن کے والدین زبردستی اُن کے منہ کھولتے نظر آتے ہیں۔ زندہ مچھلی کو منہ میں لینے کے خیال سے ہی بچے رونا شروع کر دیتے ہیں۔

جون کے ماہ کی مخصوص تاریخوں میں ہر سال بھارت بھر سے ہزاروں افراد دو دن کے مفت علاج کے لیے حیدرآباد آتے ہیں۔

انسانی حقوق کی تنظیموں اور ڈاکٹروں کا کہنا ہے کہ یہ طریقہ علاج نہ صرف ’غیر سائنسی’ ہے بلکہ حفظان صحت کے اصولوں اور انسانی حقوق کی خلاف ورزی بھی ہے۔ تاہم گوڑ فیملی ان الزامات کو مسترد کرتی ہے۔

حیدر آباد میں ’بٹھینی گوڑ‘ خاندان کے افراد کا کہنا ہے کہ حلق سے اترتے ہوئے مچھلی گلے کو صاف کرتی ہے جس سے نہ صرف دمے کا بلکہ نظام تنفس کے دیگر مسائل کا بھی مستقل علاج ہو جاتا ہے۔

بھارتی حکومت اس موقع پر خصوصی ٹرین بھی چلاتی ہے تاکہ زیادہ سے زیادہ لوگ ’مچھلی میڈیسن فیسٹیول‘ میں شرکت کر سکیں۔