بھارت میں مہا کمبھ میلے کا آغاز

مہا کمبھ مذہبی میلہ ہے جسے بھارت میں ’زمین پر منعقدہ عظیم تقریب‘ بھی قرار دیا جاتا ہے۔ یہ میلہ ہر 12 سال بعد منعقد ہوتا ہے۔ اس کا اختتام دس مارچ کو مہا شیوراتری کے موقع پر ہوگا۔

اس موقع پر الہ آباد میں دہشت گردی اور بھگدڑ کے خدشے کے تحت سکیورٹی کے سخت اقدامات کیے گئے ہیں۔ الہ آباد کے آئی جی پی الوک شرما کا کہنا ہے کہ سینٹرل پیراملٹری فورسز کے سات ہزار سے زائد اہلکار تعینات کیے گئے۔

انتظامیہ نے توقع ظاہر کی ہے کہ 2001ء میں منعقدہ کمبھ میلے کے مقابلے میں اس مرتبہ زائرین کی تعداد دس فیصد زیادہ ہو گی۔

اس میلے کی تقریبات میں بدھوں کے روحانی پیشوا دلائی لامہ، شری سری روی شنکر، بابا رام دیو اور آشرم باپو بھی شریک ہوں گے۔

ہالی وُڈ ایکٹریس کیتھرین زیٹا جانز کی شرکت بھی متوقع ہے۔ ٹائمز آف انڈیا کے مطابق جانز کہتی ہیں: ’’مجھے بتایا گیا ہے کہ یہ منظر آنکھوں اور روح کے مشاہدے کے لیے ہے۔ میں امید کرتی ہوں کہ مجھے یہاں جس چیز کی تلاش ہے وہ مل جائے گی۔‘‘

کمبھ کے میلے کے موقع پر زائرین دریائے گنگا میں نہاتے ہیں۔ ہندو عقائد کے تحت اس رسم سے گناہ دھلتے ہیں اور جنت کا راستہ کھلتا ہے۔

خبر رساں ادارے ڈی پی اے کے مطابق اس مذہبی رسم کے حوالے سے دریا میں آلودگی کی بلند سطح کے خدشات بھی پائے جاتے ہیں۔

ماہرین ماحولیات نے پانی کے معائنوں کے حوالے سے بتایا ہے کہ بھارت کے شمال میں گنگا سمیت کوئی بھی بڑا دریا ڈبکی لینے کے قابل نہیں ہے۔

محقق انیل پرکاش جوشی کا کہنا ہے کہ دراصل کوئی دریا بھی دریا نہیں، وہ سب گندے نالے ہیں۔ روزنامہ ٹائمز آف انڈیا کی ایک رپورٹ میں بتایا گیا ہے: ’’کمبھ کے میلے کے دوران آپ گنگا میں ڈبکی لینے کا کوئی ارادہ رکھتے ہیں تو زیادہ امکان یہ ہے کہ آپ زہریلے مادوں کے سُوپ میں تیر رہے ہوں گے۔‘‘

اس رپورٹ میں مزید کہا گیا کہ گندے پانی کو صاف کرنے کے پلانٹس پر اضافی خرچ کے باوجود الہ آباد کے قریب دریائے گنگا میں ابھی تک بہت زیادہ انسانی فضلہ اور کچرہ پایا جاتا ہے۔

حکومتی اندازوں کے مطابق دریا کے ساتھ ساتھ آبادی میں بھی 20 فیصد سے زائد اضافہ ہوا ہے۔

دریا کے آلودہ پانی کے باوجود کمبھ کے میلے کا جوش کم نہیں ہوا۔ انتظامیہ کا کہنا ہے کہ چھ اہم دِنوں میں تقریباﹰ نو کروڑ افراد کی جانب سے ڈبکی لگانے کی توقع ہے۔

ng/aba (PTI, dpa)