ترک وزراء پر امریکی پابندیاں،تنازعہ شدت اختیار کر گیا

واشنگٹن انتظامیہ نے ترکی کے وزیر انصاف اور وزیر داخلہ کو ایک امریکی پادری پر من گھڑت الزامات لگانے کا ذمہ دار ٹھہراتے ہوئے ان دونوں پر پابندیاں عائد کر دی ہیں۔ جرم ثابت ہونے پر پادری برونسن  کو ترکی میں پینتیس سال قید کی سزا ہو سکتی ہے۔

وائٹ ہاؤس میں امریکی پریس سیکرٹری سارہ سینڈرس نے بدھ کی شام اعلان کیا کہ ترک وزیر انصاف عبدالحامد گل اور وزیر داخلہ سلیمان سولو، پچاس سالہ پادری کی غیر قانونی گرفتاری و سزا کے ذمہ دار ہیں، ’’ ہمارے خیال میں اینڈریو برونسن ترک حکومت کے غیر منصفانہ اور جانبدارانہ اقدام کا شکار ہوئے ہیں۔‘‘

سینڈرس نے مزید کہا کہ ابھی تک اس سلسلے میں ایسا کوئی بھی ثبوت پیش نہیں کیا گیا کہ جس کی بنیاد پر یہ کہا جا سکے کہ پادری نے کچھ غلط کیا تھا۔ ان پابندیوں کے بعد امریکا میں ان دونوں وزراء کی جائیدادیں ضبط کر لی جائیں گی اور کوئی بھی امریکی شہری ان کے ساتھ کسی قسم کا کاروبار نہیں کر سکے گا۔

امریکی پادری کو پہلی مرتبہ اکتوبر 2016ء میں اس وقت گرفتار کیا گیا تھا، جب ناکام فوجی بغاوت کے بعد انقرہ حکومت کی مختلف کارروائیوں کا سلسلہ جاری تھا۔ اینڈریو برونسن پر الزام ہے کہ وہ کالعدم کردستان ورکرز پارٹی (پی کے کے)  اور جلا وطن ترک مبلغ فتح اللہ گولن کو تعاون فراہم کر رہے تھے۔

گزشتہ ہفتے  برونسن کو جیل سے رہا کر دیا گیا تاہم وہ بدستور نظر بند ہیں۔ ساتھ ہی ترکی چھوڑنے کی ان کی درخواست بھی رد کر دی گئی تھی۔

ترک صدر رجب طیب ایردوآن نے کہا ہے کہ ان پابندیوں سے کوئی اثر نہیں پڑے گا۔ دوسری جانب امریکی وزیر خارجہ مائیک پومپیو کے مطابق وہ اگلے ہفتے اپنے ترک ہم منصب سے برونسن اور ان پابندیوں پر بات کرنے کے لیے ملاقات کریں گے۔