ترکی اور یونان میں زلزلہ: درجنوں افراد ہلاک، سینکڑوں زخمی

بحیرہ ایجیئن کے ترک ساحلی شہر ازمیر سے ہفتہ اکتیس اکتوبر کو ملنے والی رپورٹوں کے مطابق امدادی کارکن زلزلے کے ان شدید جھٹکوں کی وجہ سے منہدم ہو جانے والے والی متعدد بلند و بالا عمارات کے ملبے کے نیچے دبی ہلاک شدگان کی لاشوں اور زخمیوں کی تلاش جاری رکھے ہوئے ہیں۔

ترکی میں زلزلہ، امدادی کارروائیاں جاری، 22 افراد ہلاک

ہفتے کی صبح تک ملنے والی رپورٹوں میں تصدیق کر دی گئی کہ تب تک اس طاقت ور زلزلے کے باعث کم از کم 27 افراد ہلاک ہو چکے تھے جبکہ زخمیوں کی تعداد بھی 800 سے متجاوز ہو چکی تھی۔

سینکڑوں ضمنی جھٹکے

یہ زلزلہ اتنا شدید تھا کہ اس کی وجہ سے ترکی کے تیسرے سب سے بڑے شہر ازمیر میں کئی عمارات زمیں بوس ہو گئیں جبکہ ترک ساحلی علاقے اور یونانی جزیرے ساموس کو ایک سونامی کا سامنا بھی کرنا پڑا۔

اس زلزلے کے بعد متاثرہ علاقوں میں سینکڑوں کی تعداد میں زلزلے کے ضمنی جھٹکے بھی ریکارڈ کیے گئے۔ ترک امدادی کارکن آج ہفتے کی صبح ایک آٹھ منزلہ عمارت کے ملبے سے ایک نوجوان کو زندہ نکال لینے میں کامیاب ہو گئے۔

زلزلے اور سونامی، انڈونیشیا میں ہلاکتوں کی تعداد دو ہزار ہو گئی

اسی طرح ایک اور منہدم ہو جانے والی عمارت کے ملبے سے امدادی کارکنوں نے دو خواتین کو بھی زندہ نکال لیا، جن کی عمریں 35 اور 53 برس بتائی گئی ہیں۔

سب سے زیادہ ہلاکتیں ازمیر میں

ترکی کا شہر ازمیر اس زلزلے سے اتنا شدید متاثر ہوا کہ ہلاک شدگان کی سب سے زیادہ تعداد اسی شہر کے باسیوں کی تھی۔ قدرتی آفات سے نمٹنے کے ذمے دار ترک قومی ادارے کے ایک بیان کے مطابق صرف ازمیر میں اس زلزلے اور اس کی وجہ سے ہونے والی تباہی نے کم از کم 25 افراد کی جان لے لی۔

استنبول میں اگلے تباہ کن زلزلے میں ’لاکھوں ہلاکتوں‘ کا خدشہ

اسی طرح بحیرہ ایجیئن میں واقع یونانی جزیرے ساموس کے شمالی حصے میں اس زلزلے کی وجہ سے ایک دیوار گرنے کے نتیجے میں کم از کم دو نوجوان ہلاک ہو گئے۔ ساموس کے جزیرے پر زلزلے کی وجہ سے زخمی ہونے والوں کی تعداد کم از کم 19 بتائی گئی ہے۔

سونامی کی وجہ سے سیلاب

اس زلزلے کے بعد پیدا ہونے والی سونامی لہر جب ترک ساحلی علاقے تک پہنچی، تو اس کی وجہ سے کئی سڑکیں اور رہائشی علاقے زیر آب آ گئے۔ اسی طرح ساموس کے یونانی جزیرے پر واتھی کے بندرگاہی شہر میں بھی یہ سونامی کئی سڑکوں اور گلیوں کے سمندری پانی میں ڈوب جانے کا باعث بنی۔

انڈونیشی صوبے آچے میں سونامی کو پندرہ برس ہو گئے

ریکٹر اسکیل پر اس زلزلے کی شدت 6.9 ریکارڈ کی گئی، جس کا مرکز ساموس کے یونانی جزیرے سے شمالی مشرق کی طرف بحیرہ ایجیئن کی تہہ میں زمین میں 16 کلومیٹر کی گہرائی میں ریکارڈ کیا گیا۔

یہ زلزلہ اتنا شدید تھا کہ اس کے جھٹکے استنبول سمیت ترکی کے کئی بڑے شہروں، یونانی دارالحکومت ایتھنز اور مشرقی یورپی ملک بلغاریہ تک میں محسوس کیے گئے۔

م م / ع س (اے پی، ڈی پی اے، اے ایف پی)